Shillong, Risaw, 09: San ngut ki Myntri jong ka Hima Mylliem bad kynthup ruh ïa u Basan jong ka Raid Nongkseh ha ka sngi Balang ki la aiti da ka jingujor ha u Deputy Chief Executive Member (Dy. CEM) jong ka Khasi Hills Autonomous District Council (KHADC) u Bah Pynshngaiñ N. Syiem uba peit ïa ka tnat Elaka Administration da kaba kynnoh ba u Syiem jong ka Hima Myllliem u Pa’iem Ainam Manik Syiem u la die lilam ïa ka lyngkhot khyndew jong ka Hima Mylliem kaba don ha khlaw Mawroh khlem ka jingtip bad ka jingmynjur na ka Dorbar Pyllun jong ki Bakhraw Batri jong ka Hima Mylliem kaba long pyrshah ïa ki riti ki dustur bad ïa ki aiñ jong ka Hima Mylliem.
Ha ka jingujor ba la ai kopi da ki Myntri sha ki lad pathai khubor, ïa kaba la soi da u Myntri Syndor, u Myntri L.Rumnong Sohsla, u Myntri Nongkhlaw, u Myntri Kharbteng, u Myntri Shanpru bad u Basan ka Raid Nongkseh ki la pynpaw ruh ïa ka jingsngew kyndit bad ïa ka jingsngewsih ban ïohi ba dang shen ha kawei na ki kot khubor Phareng kaba la pynmih ha ka 28 tarik, Nailur, 2024 bad ha ka 1 tarik, Risaw, 2024 halor ka jingleh donbor jong u Pa’iem Ainam Manik Syiem ïa ki kam synshar khadar lyngba ka jinglum pisa beaiñ kum ka bai nguh syiem khlem ka jingkheiñ jingdiah bad ka jingpyrshang ban kam trai ïa ka khyndew Hima kaba don ha Mawlai Mawroh da kaba tih bad bret khyndew pathar.
Shuh shuh ha kane ka jingujor, kine ki san ngut ki Myntri lem bad u Basan ka Raid Nongkseh ki la kam ruh ba ki la lap ba u Pa’iem Ainam u la die lilam taddor ïa ka khyndew Hima kaba don ha ka Khlaw Mawroh da kaba aiwai shi lyngkhot ka khyndew sha kawei ka riewshimet ha ka dor T. 1,20,000 lak shi snem na ka bynta 20 snem lyngba ka jingïateh kular.
Ki Myntri bad u Basan jong ka Raid Nongkseh ki la kynnoh ruh ba ka jingleh jong u Pa’iem Ainam Manik Syiem ban aiwai ïa ka khyndew haduh 20 snem khlem ka jingtip bad ka jingmynjur jong ka Dorbar Pyllun ki para Bakhraw jong ka Hima Mylliem ka long ka jingleh donbor ïa ka kam synshar khadar bad ka long ruh ka jingpynkheiñ ïa ka kyndon 7 (c) bad (e) bad 4 (A) jong ka Mylliem Syiemship Act 2007 bad ïa ka Administration of Mylliem Syiemship Rules, 2015.
Halor kine ki daw, kine ki Myntri bad u Basan jong ka Raid Nongkseh ki la dawa ïa ka Khasi Hills Autonomous District Council (KHADC) ban weng noh mardor ïa u Pa’iem Ainam na ka khet synshar bad ki la kynnoh shuh shuh ba u la don bynta ruh kumba ladep ujor naduh ka 26 tarik, Risaw, 2023 ban pynjah klep ïa ka pisa jong ka Hima Mylliem kaba long T. 5, 58, 30, 451 klur da kaba ai dulir pynskhem khyndew ïa ka khyndew jong ka Hima Mylliem kaba don ha iew Mylliem Rim.
