Kynmaw u Narendra Modi ïa u Syiem Tirot Sing u khlawait ba shlur ka Jylla Meghalaya

Shillong, Naitung, 31: U Myntri Rangbahduh ka ri, u Narendra Modi ha ka sngi u Blei u la ïaroh ïa ki sienjam jong ka Jylla Meghalaya kaba la ïashim bynta pura ban rakhe ïa ka Azadi Ka Amrit Mahotsav bad pynkynmaw ïa ka jingshlur jong u khlawait bashlur jong ka Jylla u Tirot Sing.
U Modi u la pynpaw ïa kane haba kren ha ka bynta ba 91 jong ka Mann Ki Baat.
U la pynpaw ka jingkmen ïa ka rukom ba ka Amrit Mahotsav ka la long ka jingïakhih paidbah ha kylleng ka ri.
Haba ïaroh ïa ki nongshong shnong kiba la pdiang ïa ka Mahotsav ban kynmaw burom ïa ka jingdap 75 snem ka jingïoh jinglaitluid jong ka ri India, u Modi u la ong, ‘kawei na kum kane ka jingjia, ka la jia ha Meghalaya mynta u bnai. Ki briew ki la kynmaw ïa u khlawait bashlur jong ka Meghalaya, u Tirot Sing ha ka lyngkhuh sngi ïap jong u. U Tirot Sing u la ieng skhem ban pyrshah ïa ka jingïasylla jong ki Phareng na ka ri Bilat ban pynïaid ïa ka rilum ka Khasi bad ban pynduh ïa ka kolshor jong kane ka thaiñ. Bun ki riewdonsap ki la pyni ïa la ki jong ki sap ha kane ka prokram. Ki la pynkhie im biang ïa ka Histori. La pynlong ruh ïa ka tamasa kum shibynta jong kane ka prokram, ha kaba la pyni ïa ka kolshor ba khraw jong ka Meghalaya ha ka rukom kaba itynnad.”
U Modi u la pyndonburom ïa u Shaheed Udham Singh bad baroh kiwei ki riewshlur kiba la aiti lut bad len lade ban pha ïa la ka jingim na ka bynta la ka ri. “Paralok, ha ka 31 tarik Naitung, kaba long mynta ka sngi, baroh ma ngi ki nongshong shnong ngi ai khublei ïa ka jinglenlade jong u Shaheed Udham Singh,” u la ong.
Ka bynta kaba mynta ka sngi jong kane ka prokram ka long halor ka jingïoh jinglaitluid ka ri.
“Baroh ngin sa sakhi ïa ka khyllipmat kaba khraw bad kaba kyrpang….jin lada lah kha ïa ngi ha ka por jong ka jinglong mraw, kumno ngin lah ban mutdur ïa kane ka sngi? Ka jingthrang ïa ka jinglaitluid na ka jinglong mraw, ka jingkhuslai ïa ka jingïoh jinglaitluid na ki kynjri jong ka jingshah teh mraw- katno kalong kaba eh! Kito ki sngi, kawei pa kawei ka sngi, ngin ïohi da ki million ki briew jong ka ri ki ïakhun, ki aiti ïa lade na ka bynta ka jinglaitluid,” la ong shuh shuh u Myntri Rangbahduh.
Ka bynta kaba 91 jong ka Mann Ki Baat la pyni ha ki sngi shuwa ka sngi ïoh jinglaitluid.
“Mynta ka kynti ka ‘Mann Ki Baat’ ka long kaba kham kyrpang. Ka daw na ka bynta kane mynta ka kynti ka dei ka sngi ïoh jinglaitluid ka ri, haba ka India kan rakhe ïa ka lyngkhuh 75 snem ka jingïoh jinglaitluid ka jong ka,” la ong u Modi.