Shillong, Jylliew 11: Ka Kot Khubor Mawphor bad Highland Post ha ka sngi Saitjaiñ, ka la kynmaw burom ïa u nongseng jong ka, i Bah RM Marweiñ ha ka lyngkhuh sngi ïap kaba ar jong i.
Kane ka jingkynmaw burom ryngkat ka jingïadon lang ka ïing ka sem bad kiba haïing hasem ka long da ka jingpynkup burom ïa u Bah Nicholas Kharnami, u Samla Rangbah uba la trei met bad mynsiem ban pynkylla ïa ka jingmut jingpyrkhat ki briew ban bret pathar ïa ki plastik bad ki ñiut ki ñer lyngba ka Prokram “Pla ïew” bad “My Shillong My Pride”.
Ïa ka jingïalang ba la pynlong ha Head Office ha Mawïong, la pynïaid da u Bah DL Siangshai, Editor bad la ïoh jingkren na ka liang ka ïing da u Bah SM Marweiñ, General Maneger bad na ka liang ka ophis da u Bah P. Sohkhlet, Joint Editor.
Ka jingpynkup burom ïa u Bah Nicholas (Bah Manik) ka long da ka Readington Award 2023, kaba la sdang naduh u 2022 kum ka jingpynsah kynmaw ïa ka jingshakri une u rangbah. Ka Khusnam ka long da ka Citation bad ka Pisa ba 15,000 tyngka.
U Bah Nicholas ha ka jingkren jong u, u la ong ba ïa kane ka pisa ba u ïoh na Mawphor un thied Glove na ka bynta ki nongtrei ka Shillong Municipal Board kiba trei ha ki kam pynkhuid.
Shuh shuh ha ka jingkren jong u, ula ïathuh ba kumno ha kawei na ki jingïakynduh bad i Bah RM Marweiñ kumba 20 snem eiei mynshuwa mynba u leit die tiar ha ïing jong i, ka la ai mynsiem ïa u ban trei ne leh ïa kano kano ka kam khlem ka jinglehraiñ bad trei da ka jingieit.
“Kane ka jingïashongkai ba shipor jong nga bad i Bah Reading, ka la ai mynsiem ïa nga haduh mynta ban trei ïa kane ka kam pynsngewthuh paidbah ïa ka jingkordor ka mei mariang khlem kano kano ka jinglehraiñ”, u la ong.
Ha kaba ïadei bad ka jingsngewthuh jong u halor ka jingkordor jong ka mariang, u la ïathuh ba dei i Meiieit jong u, iba ju die ktung ha ïewduh, iba la hikai ïa u da kaba i ju tam ïa ki plastik kiba don ha madan ha ka lynti sha ïewduh. “Dei ma i ruh iba la hikai ïa nga shaphang ka jingdonkam bad ka jingkordor ka pla ïew, ba u la pynmih ïa kane ka prokram “Ka Pla ïew”.
Halor ka jingïoh ïa kane ka Khusnam, u la ong ba um pat sngewdei uba bitdor ban ïoh ïa kane ka khusnam, namar ka kam bad ka jingpynsngewthuh jong u ïa ka jingleh khuid pat pat long kaba jop namar dang bun ki briew ki bym pat sngewthuh bad kiba dang bret pathar ïa ki plastik bad ki jaboh jabaiñ.
U la ong ruh ba ryngkat ka jingïatreilang bad u Mawphor bad Highland Post un sa nang trei khambha bad kham pynïar shuh shuh ïa kane ka jingtreikam. Ia ka Khusnam la sam da i Kong Nina B. Marweiñ, kurim jong i Bah Readington.
Hadien kane ka jingïalang kaba rit bad shongkun, la pynlong ïa ka jingleh buh syntiew sha lum jingtep kum ka jingkynmaw burom ïa u nongprat lynti ïa u Mawphor, Highland Post bad ïa kiwei kiwei de ki kam.
