Kynmaw burom ki trai ri trai muluk, ki seng bhalang bad HNLC ïa u khlawait ka Jaidbynriew

Shillong, Naitung 17 : Ki trai ri trai muluk, ka seng HNLC, KSU, HNYF, FKJGP, HYC, HITO bad kiwei kiwei, ki la kynmaw burom ïa ka lyngkhuh snem sngi iap ba 188 jongu Khlawait ka Jaidbynriew u Tirot Sing Syiem uba la nud ban ïakhun thma pyrshah ïa ki shipai phareng tad haduh ban da iap kum u Syiem ba khlem pyndem wait ha phatok ha Dhaka ha ka 17 tarik Naitung 1835.
U Tirot Sing Syiem u dei u Syiem ka Hima Nongkhlaw bad u dei tang ma u kum u Syiem uba la nud ban ïeng ïakhun thma bad ki shipai ka sorkar phareng ha u snem 1829. Hynrei ha ka 13 tarik Kyllalyngkot 1833 ki shipai ka sorkar phareng ki la ïoh ban kem ïa u bad set phatok ïa u ha Dhaka tad haduh ba un da iap ha ka 17 tarik Naitung 1835.
Ki paid ka bri u Hynniewtrep ryngkat bad ki nongïalam jong kitei ki Seng ba la kdew haneng ki la kynmaw burom da kaba leit buh syntiew ha ki Mot sah kynmaw ba la tei ha ki jaka bapher bapher. Hangne ha nongbah Shillong ka jingleit buh syntiew ka long ha ka dur mot jong u Tirot Sing Syiem kaba ha madan Iewrynghep (Firebrigade).
Ki nongïalam ka seng HNLC kiba don mynta ha ka miej jingïakren bad ka sorkar pdeng-sorkar jylla ruh ki la ïoh ban leh burom ïa une u khlawait ka jaidbynriew da kaba leit buh syntiew lang ha u maw Mot ha madan Iewrynghep. Kan long ka sien kaba nyngkong hadien laiphew tylli ki snem ba ki nongïalam ka seng HNLC ki la ïoh ban wan ïashim bynta hapoh ka jingïalam u Vice Chairman u bah Manbhalang Jyrwa bad u Political Secretary bah Aristerwell Thongni.
Na ka liang u President ka KSU u Samla Lambok Starwell Marngar haba kren sha ki lad pathai khubor hadien ba la dep buh syntiew ha utei u maw mot u la kyntu ïa ka kynhun Myntri ba ha kane ka kynti haba ki leit sha Delhi ki dei ban wanphai ryngkat ki khubor kiba bha da kaba kin ïoh ka jingkular na ka sorkar pdeng ïa ka jingpytreikam kloi noh ïa ka ILP ha ka jylla bad ban pynrung ïa ka ktien Khasi bad Garo ha ka Khyrnit kaba Phra jongka Riti Synshar ka ri India.
“ Ngi kitbok kit rwiang ïa baroh ki myntri sorkar ha kane ka jingleit Delhi jongki shen ban ïa kynduh ïa ka sorkar pdeng khnang ba kin ïoh ban wanphai sha ka jylla ryngkat ka khubor ba bha kata ban pyntreikam noh ïa ka ILP ha ka jylla bad kumjuh ruh ban pynrung ïa ka ktien Khasi bad Garo ha ka Khyrnit kaba Phra” ong u bah Lambok.
“ Ngi kwah ruh ban kren shai ba mynta ka kynti kam dei ban kut tang ka jingleit Delhi hynrei haba ki wan phai sha ka jylla ki dei ban ïathuh shai kaei kaba mih na ka jingïakren bad ka sorkar pdeng bad balei ne na kaei ka daw ba ka sorkar pdeng ka pynslem ban pyntrekam ïa kine ki ar tylli ki mat ba la mynjur da ka Resolution hapoh ka ïing dorbar thawaiñ ka jylla. Ngi kwah ban shai bad tip khnang ban nang ban rai kaei kaba ngin leh pat nangne shakhmat.” ong biang u President ka KSU.
U la ong shuh shuh ba ka jingwan tuid ki mynder bad kiwei ki jaidbynriew sha ka jylla ka jur bha namar bym don aiñ ban khanglad ïa ki kumta ka la dei ka por ba ka sorkar kan pyrkhat sani bha bad pyntreikam noh ïa kane ka kyndon aiñ.
U samla Lambokstar u la ong lada ka sorkar pdeng ka ïai pan por shi ïai pan por ban bishar bniah ïa ka ILP ka pynpaw ba kam burom ïa ka Resolution ba la mynjur da ka Assembly bad ka pyni ruh ba ki 60 ngut ki MLA jongka jylla ki la pheil ban pynbor ïa ka sorkar pdeng ban leh ïa kaba donkam.
“ Ka dei ka resolution kaba tang shi sla ym dei da ki palat 2000 sla. Kumta ka sorkar pdeng ka dei ban pynshai kdar balei kam mynjur ban pyntreikam ïa ka ILP ha Meghalaya lada ka lah ban ai sha kiwei ki jylla kane ka thaiñ kum sha ka Manipur, Mizoram, Arunachal Pradesh bad Nagaland” ong biang u sala Lambokstar.
U la ong ba ym dei ban aidaw ba ka jylla Meghalaya ka dei ka jylla ba hap ban ïaid lyngba sha kiwei ki jylla hynrei ka daw ka dei ka jingbym don mon jongka sorkar pdeng.
U la ther ruh ïa ka sorkar ba kam lah ban pyntreikam ïa ka Meghalaya Residents, Safety and Security Act (MRSSA) 2016 da kaba ong “ Ngim tip balei ki buhrieh wat ïa kane ka aiñ ruh haduh mynta”.
Halor ka jingrai jongka sorkar ban wanrah ki jingpynkylla ha ki kyndon jongka MRSSA ha u snem 2020 une u President ka KSU u la ong ba ka don kaei re kaei ka jingïa suhbuit na sha lyndet pyrshah ïa ki trai ri trai muluk jongka jylla da kaba ong ruh “ Kano kano ka aiñ ba la saiñdur ban ai jingïada ïa ki trai ri trai muluk kin kut tang ha kaba shu eksamin beit. Ngim tip kaei ka jingthmu hynrei kito kiba shong ha Secretariat te ki tip shai bha balei donkam ïa ka sorkar pdeng ban bishar bniah ïa kane ka aiñ ruh.Lada kine ki nongmihkhmat kiba la jied da ki paidbah kim lah ban thaw aiñ te kan don jingmyntoi ban don kata ka Secretariat ruh?”
U la ther shuh shuh ïa ka sorkar ba kam shym la buh ïa ki entry bad exit point kumba la kdew da ka MRSSA 2016.
Ka sorkar ka la dep kular ban sdang ïa ka wat ba nyngkong ban buh ïa kita ki entry bad exit point bad ki la plie ruh ïa ka entry point ha Umling, Ri Bhoi hynrei kaba sngewsih ïa katei ka jaka la pynkylla noh ban talasi ïa ka jingpang COVID-19. Kumta u la ong ba ka sorkar ka dei ban kren shai halor kane ka MRSSA ruh. Ki la pynpaw ba ki la dep pynkylla ïa ka aiñ bad phah sha u Lat ban soi pynskhem ïa ka hynrei mynta ym tip shano kata ka aiñ ka don?
“Imat ka daw hi ka long ba kane ka sorkar kam don mon ban pyntreikam ïa kane ka aiñ MRSSA tangba ngim lah ban pdiang da lei lei ruh ïa kane, ngi la thait la jlep ïa kane ka kam ïaleh khun ja kai bad kine ki aiñ ban ïada ïa ka jaidbynriew kiba ngi la dawa mynta la bun bun snem” ong u Samla Lambokstar.
Ha kajuh ka por u la ong ba ka sorkar ka la dei ban khylliap ne pynwai noh ïa ka mat lynti rel ha ri lum Khasi bad Jaintia katba ym pat don kine ki aiñ ban ïada na ka jingwan tuid ki jaidbynriew bapher bapher sha ka jylla.
Ha kaba ïadei bad ka jingïeng pyrshah jongka KSU ban pyntreikam ïa ka UCC ha ka jylla, ula ong ka jingthmu jongka sorkar pdeng ban pyntreikam ïa ka UCC ka dei tang kawei ka thong kata ban pynthikna ba ka ri India kadei kata ka Hindu State. Kane kan sa ktah jur ïa ka jinglong tynrai jongka jaidbynriew ïa kaba ka KSU kan ym ailad da lei lei ruh ba kan urlong.