Shillong, Naitung, 29: Kum ka jingkynmaw burom ïa ka jingshlur bad ka jingaiti ïa la ka jong ka jingim da ki shipai ba shlur jong ka ri India ha ka thma Kargil, ki shipai BSF Meghalaya Frontier ki la pynlong ïa ka jingshad Jazz Band kaba la pynkhih mynsiem ha ka sngi Saitjaiñ ha Matri Gate, ICP Dawki hapoh ka jingpynïaid jong ki shipai BSF 4th Battalion.
Ha kane ka sngi la sakhi lang da u DIG ka tnat BSF Jowai u Satish Kumar Dogra, u N.V. Siam, 2IC 4th Bn BSF; arngut ki ophisar, 10 ngut ki Subordinate Officer, bad 20 ngut kiwei kiwei ki heh ophisar shipai, kynthup ruh u Manager ka LPAI u Mr. T.C. Chako bad ki nongtrei na ka LPAI.
Ka Jazz Band ka la pynkhih mynsiem ïa ki nongpeitkai da ki sur ba sngewthiang bad ki jingrwai ba ieit ri kiba la sawa lyngba ki lum ki them jong thaiñ Dawki. Kawei pa kawei ka sur jingrwai ka la long kum ka jingburom ïa ki martir ka thma Kargil kiba la pynpaw ïa ka jingshlur, kiba la aiti ïa la ka jong ka jingim ban shakri ïa ka ri na ka kti jong ki nongshun.
Ka jingaiti shlur jong ki shipai ka ri ha ka thma Kargil ka dang ïai bteng ban ai mynsiem ïa ki pateng ka ri India bad ka ieng kum ka dak kaba tyngshaiñ jong ka jingsarong bad ka jingïatylli jong ka jaitbynrïew.
Ha kane ka sngi ki nongshong shnong bad ki nongjngohkai pyrthei na Bangladesh kiba la tuid ban ai burom bad ban ïadon bynta lang ha kane ka jingkynmaw burom ïa ki shipai jong ka ri India.
Kane ka jingrwai, kaba la sawa ha kylleng u pud u sam jong ka Indo-Bangladesh, kam shym la long tang ka jingrakhe ïa ka jingjop jong shipai hynrei ka la jingpynskhem biang ïa ka mynsiem ba neh jong ka India ïa ka jingieit ri, ka jinglah ban ïakhun, bad ka jingaiti lut.
Ka la pynpaw ruh ïa ka jingaiti jong ki shipai BSF ban ïada bad ban pynneh ïa ka shongsuk shongsaiñ ha khappud jong u pud u sam ka ri.
