Nongstoiñ, Naiwieng 13: Ka seng ki Nongsumar Dawai Khasi Nylla hapoh ka jinglamkhmat u bah Spasterlin Nongrem bad ka kong Lila Nongkhar, mynta ka sngi ki la leit jngoh kyrpang ïa u bah Francis K Mawlot u ba dei uwei na ki rangbah u ba la noh synñiang lem shibun ïa ka imlang sahlang khamtam eh ïa ka Nongstoiñ bad ïa ka West Khasi Hills District hi baroh kawei.
Ha ka jingleit sngew lem, ka seng ka la pynkup ruh da ka jaiñ kum shi bynta ban long kum ka dak jong ka jingpynkup burom namar ki nuksa ba bha kaba utei u rangbah u la synñiang ha ka thaiñ.
Utei u rangbah u ba la kynjoh sha ki 82 snem tam ka rta u dei u MLA ba nyngkong tam jong ka Nongstoiñ konstitwensi, u ba la wanrah ïa ka District West Khasi Hills, u ba la donkti ruh ban ïakhun radbah ban pynlong Nongbah jong ka District ïa ka sor Nongstoiñ.
Utei u rangbah ha ka por ba la shah jied kum u MLA u la ïoh ïa ka shuki Myntri bad u dei ruh u Myntri Sorkar Jylla Meghalaya ba khynnah tam, kata ha u snem 1972 shaneng. Ym tang katta hynrei la ong ba da ka jingïaleh jong u, la lah ban wanrah biang ïa ka skul Kendra Navodaya Vidyalaya na Mawkyrwat sha Nongstoiñ, da kaba ïaknieh tyngeh ryngkat ka jingïakyrshanlang da ka ïing u bah R.R.Nongsiej bad u bah Medar Nongkhar baroh ar ngut kiba la bam kwai ha Dwar u blei.
Shuh shuh utei u rangbah ryngkat ka kurim jong u kata ka kong Philomina Rymbai 80 snem ka rta, ki la long kiwei na ki nonghikai nyngkong eh ha ka skul St.Peter Pyndengrei kaba ju khot ME school ha kitei ki snem.
Ym tang katta la ong shuh shuh ba udei uwei na ki nongsaiñdur lang ban pynurlong ïa ka Nongstoiñ College ba kan ïeng, bad u la long u nongkitkam, ha kaba u la bat ruh kum u Pyndap Phang ba nyngkong jong ka Nongstoiñ College.
Kaba kham phylla shuh shuh kaba utei u rangbah u la leh na ka bynta ka kam shakri paidbah ka long ba, hadien ba ka Nongstoiñ College ka la ïatyngkhuh ïa u mawsiang haba ïadei bad ka jingsiew tulop ïa ki nonghikai, u bah Francis K Mawlot u la die noh ïa la ka ïing ka sem kaba ha shnong Pyndengrei, bad ka ïing ka la hap shu shong ïing wai kumba katto katne snem ha ka shnong Mawkhlam Nongpyndeng.
Mynta utei u rangbah wat hapdeng ka jingnoh ka rta pynban u dang long uba shait ba khlaiñ bha met bad mynsiem, u dang ïai bteng ban rwai bad kren biria ban pynsamrkhie ïa kiba leit jngoh ïa u, bad u shong u sah ha ka shnong Mawkhlam Nongpyndeng ryngkat ka kurim, ki khun ki ksiew bad kiwei kiwei.
