Kynmaw burom ka Seng Kur Chyne ïa ka lyngkhuh ba 81 snem jong ka jingkhlad noh u (L) Rev. Amirkha Chyne

Mawkyrwat, ‘Nailur 22 : Ka Seng Kur Chyne ryngkat bad ka Balang Presbyterian Rangthong mynta ka sngi ka 22 tarik u Nailur, 2025 ka la ïoh ban pynlong ïa ka jingkynmaw burom ïa ka lyngkhuh kaba 81 snem ka jingkhlad noh u (L) Rev. Amirkha Chyne, uba la khlad ha ka 22 tarik Nailur, 1944.
Lah ban kdew ba u (L) Rev. Amirkha Chyne u dei uwei na ki rishot ba khraw ha ka imlang sahlang, uba la noh synñiang ha shibun ki liang – naduh ka thoh ka tar, ka imlang sahlang, haduh ka jingngeit bad ka jinglong Kristan.
Ha kane ka sngi jong ka jingkynmaw burom ba la pynlong ha u mot sahnam ha Lum Jingtep ka Balang Presbyterian Rangthong, la pynïaid da u Dr. W.P. Chyne. Hadien kata, u Tymmenbasan S.C. Syiemlieh u la ïathuh khana lyngkot halor ka jingim bad ka jingïaid lynti jong u (L) Rev. Amirkha Chyne. La bud sa da ka jingkren na u Bah Titoswell Chyne uba dei u President Rangbah jong ka Kur Chyne uba dei ruh u MDC jong ka Sohra haba ula ai khublei kyrpang ïa ka Balang Presbyterian Rangthong, ïa ka Presbytery bad ruh ïa ka District Rangthong kiba la kynmaw burom ïa u Rangbah Kur Chyne uba la khlad noh mynta la 81 snem.
Ha kane ka sngi, la pynlong ruh ka jingbuh syntiew ha u mot sahnam, ki jingrwai, ki jingduwai bad la ïasakhi lang da ki riewrangbah na ka shnong Rangthong bad ruh na ki kur ki jait Chyne kiba la wan ban ai burom.