Shillong, Naitung, 17: Ki kynhun bapher bapher kiba kynthup ïa ka National Peoples Party (NPP) Meghalaya State Unit, ka Khun Hynñiewtrep National Awakening Movement (KHNAM) bad ka United Hynniewtrep Movement (UHM) ha ka sngi Balang ki la kynmaw burom ïa ka lyngkhuh sngi ïap kaba 189 snem jong u Syiem Tirot Sing u khlawait uba la len lade ban ïakhun da ka thma pyrshah ïa ki jingleh donbor jong ki shipai Bilat ha ri Khasi.
La lamkhmat ïa ka jingleit buh syntiew hakhmat u durmot ba shirynieng jong u Syiem Tirot Sing uba don ha phyllaw jong ka State Central Library, Shillong, da ki nongïalam ba hakhmat jong ka NPP Meghalaya State Unit party ba la sakhi lang da u Myntri ka Sorkar Jylla u Rakkam A. Sangma, u Dr. Donkupar War, u Bah Hamletson Dohling, u Bah HM Shangpliang kumjuh ruh ki nongïalam jong ka NPP Womens Wing ba la lamkhmat da ka Dr. Jasmine Lyngdoh bad kumjuh ruh ki nongïalam na ka NPP Youth Wing.
Katba na ka liang jong ka Khun Hynniewtrep National Awakening Movement la lamkhmat da u Working President u Bah Thomas Passah bad na ka liang jong ka United Hynniewtrep Movement la lamkhmat da u Bah Charlie J. Rani.
U Myntri ka Sorkar Jylla u Rakkam A. Sangma ula ong, “u synñiang u bynhei ba u Syiem Tirot Sing u la noh sha u sup u thiar jong ka ri baroh kawei kan ai mynsiem ïa ngi. Ngi lah ban pynkylla ïa ka khanapateng, ngi lah ban pynkylla ïa ka kupar hynrei ngim lah ban pynkylla pat ïa ka pakit ki mynnor.”
“U (Syiem Tirot Sing) noh synniang sha ka jingroi jingsan ka imlang ka sahlang bad khamtam eh ka jinglaitluid jong ka ri jong ngi. U dei ruh u riewieid ri uba khraw bad ki pateng ba mynta ki dei ban tip khamtam eh shaphang ka jingim jong u Tirot Sing. Dei na ki kam bad ki synniang jong u Tirot Sing ngi long kumne kumba ngi long mynta.
