Shillong, Nailur, 01: Ki shnat treikam bapher bapher jong ka National People’s Party (NPP) ki la kynmaw burom ïa ka lyngkhuh sngi kha kaba 75 snem jong u (L) Purno A. Sangma bad pynkynmaw ruh ïa u synñiang u bynhei ba u la noh sha u sup u thiar jong ki riewlum rit paid jong ka ri.
Ha Tura, u National President ka NPP u Conrad K. Sangma ryngkat bad ka MP ka Lok Sabha ka Agatha K. Sangma ki la buh syntiew ha u lum jingtep ba la tep ïa u Purno A. Sangma.
Hadien kane, la pynlong sa ïa ka jingïalang kynmaw burom ha District Auditorium, Tura ha kaba ki nongkren ki la pynkynmaw ïa ka jingïakynduh kam marmet bad u Purno bad ha kaba ki la ñiew tang ruh ïa ki kam ba u la leh kum u nongïalam uba la rilum Garo ka la sei.
La ot ruh ïa u cake da u Conrad Sangma lem bad ki nongïalam jong ka NPP.
Haba kren ha kane ka jingïalang, u Conrad K Sangma u la ong ba ki matti bad ki kam jong u PA Sangma kin ïai im shi rta.
U la ong ruh ba u P. A Sangma u la buh hakmat eh ban aiti ïa la ka jingim ban shakri na ka bynta ka bha ka miat jong ki paidbah. U la ïathuh ruh ba u PA Sangma u dei u nongseng ïa ka party NPP na ka bynta ban plie lad ïa ki paidbah ka thaiñ Shatei Lammihngi bad ïa kiwei pat ki jaidbynriew riewlum ha ka ri ban pynsawa ïa ka sur jong ki.
Une u nongïalam ba hakhlieh duh ka NPP u la ong ruh ba ki jingïohi jngai jong u Purno Sangma ka la urlong haba ka NPP ka la long ka National Party na kane ka thaiñ Shatei Lammihngi bad kaba long ruh ka sur jong kane ka thaiñ.
U la bynrap shuh shuh da kaba ong, “ïa u Purno Sanmga yn ïai sah kynmaw ïa ka jinglong ba shisur bad ka jingjemnud.. U PA Sangma u dei uba wanrah ïa ka jingïatylli hapdeng ki riewlum.”
Haba pynpaw ba u P A Sangma u dei u nongïalam uba la ai mynsiem bha, u Conrad u la ong, “u PA Sangma u dei tang u khunswet na ka shnong rit uba la poi sha ka kyrdan nongmihkmat ka Parliament kum u nongsaiñdur jong ka thaiñ Shatei Lammihngi. Kiba bun kin kynmaw ïa u kum u nongïalam uba la wanrah ïa kiba bun ki mat jong ka thaiñ Shatei Lammihngi bad uba la long ruh ka sur jong ki riewlum ritpaid ha ka ri.”
