Shillong, Nohprah 30 : Ka National People’s Party (NPP) Meghalaya ha ka sngi Saitjaiñ ka la kynmaw burom ïa ka lyngkhuh sngi ïap ba 161 jong u Woh Kiang Nangbah da kaba leit ban buh syntiew bad pynlong ruh ka jingïalang kynmaw burom kaba lyngkhot ha khmat u mot dur jong u ha State Central Library.
Na ka liang ka party hapoh ka jingïalam jong u Working President, Bah Hamlet Dohling ba dei ruh u Chief Adviser jong u Myntri Rangbah ka Jylla, la wan ban donlang bun ki nongïalam ka party kynthup ïa u Bah Bajop Pyngrope, Secretary ka Party kum u Kongsan, nangta ka President jong ka Women’s Wing Kong Jasmine Lyngdoh, President ka NPYF Bah Kitborlang Nongrem nalor kiwei kiwei kynthup ïa u Prof. Don War, Bah FL Mawlong, Bah John Kharshiing, Bah Mayborn Rapthap bad bun kiwei kiwei.
Jan baroh ki nongkren ha kane ka sngi ki la pynkynmaw ba u Kiang Nangbah watla um don ka jingnang jingstad pynban ka mynsiem shakri ïa ka Jaidbynriew ka khraw bad um salia watla u hap ban aiti ïa la ka jingim tang na ka bynta ban pyllait ïa ka Jaidbynriew na ka tyrsim jong ki nongwei.
Ki la ong ruh ba ki sngewkmen ba ka mynsiem jong une u Khlawait ka Jaidbynriew ka pyntylli ïa ka Jaidbynriew watla ki don ha kano kano ka kynhun.
