Nongstoiñ, Risaw 21: Ka Seng Khasi Students’ Union West Khasi Hills District Unit, kum shi bynta ban rakhe ïa ka lyngkhuh sngi ïap kaba 37 jong u Paiem Wickliffe Syiem (Syiem Khynnah Hima Nongstoiñ), ha ka sngi hat majai 21 tarik u Risaw, ka la leit ban buh syntiew ha u mot sah kynmaw jong utei u Syiem u ba don ha ka shnong Porsohsat WKHD.
Ha shwa ban pynlong ïa ka jingïalang kaba lyngkot ha utei u mot sah kynmaw, na ka liang jong ka Seng ka la pynlong ruh ïa ka jingsngap jar kaba 1 minit kum ka daw ban kynmaw burom ïa u tei u Syiem khynnah jong ka Hima Nongstoiñ.
Ïa katei ka jingïalang kaba lyngkot la pynïaid da u Samla Franklin Syiemiong General Secretary ka KSU WKHDU, ha ryngkat ka jingïadonlang ruh u Spaindarsing Lyngkhoi Office Secretary ka KSU Sengkmie, u samla John Fisher Nongsiang President KSU WKHD, ki nongïalam na ki Circle bad Unit jong ka District.
U Samla Spaiñdarsing Lyngkhoi Office Secretary KSU Central Body haba ai jingkren ha katei ka jingïalang, u la ong ba ha kum kane ka sngi ka Seng KSU bad ka FKJGP lem bad ka Hima Nongstoiñ, ki ju kynmaw burom ïa ka sngi ïap u Paiem Wickliffe Syiem, u Syiem Khynnah ka Hima Nongstoiñ namar ba u dei u wei na ki riew khraw jong ka Jaitbynriew, hynrei kaba lyngngoh ba balei kiwei ki para dkhot jong ka Jaitbynriew kim kynmaw burom ïa kane ka sngi.
U la ong ruh ba kum ka Jaitbynriew donkam ban tip ïa ka History jong ki riew khraw ka Jaitbynriew ym tang ban shu ïa rakhe tang da kaba buh syntiew. U la kyntu ïa ki dkhot ka KSU bad ïa ki dkhot ka Jaitbynriew ba bud ïa ki nuksa u Paiem Wickliffe watla ym lah thik kumba long ka ma u, hynrei ban pyrshang kumba u Paiem u ong ïaid shakhmat, ïaleh tyngeh bad wat pyndem tdong.
