Nongpoh, Naitung 17: Kum ka jingburom ïa uwei na u khlawait ka ri ha ka lyngkhuh sngi ïap jong u, ba u dei u syiem uba la ïakhun pyrshah ban pynlaitluid ïa ka jaid bynriew, ka Khasi Students Union bad ka Federation of Khasi Jaintia and Garo People na Ri Bhoi District mynta ka sngi ki la leit buh syntiew ha u Mot sahkynmaw u Syiem Tirot Sing, uba don ha phyllaw ka skul Jawahar Navodaya Vidyalaya (JNV) Niangbari, kaba ki leh burom halor ka lyngkhuh sngi ïap ba 190 snem jong une u syiem ba shlur ka jaid bynriew.
Ki nongïalam jong kine ki seng ba la lamkhmat da u Bah Lambok Rymbai kum u Vice President ka KSU North Khasi Hills District bad u Bah Banroi Wahlang kum u nongïalam ka FKJGP na Ri Bhoi ha ryngkat ki dkhot ki la pynlong shwa ïa ka jingïalang shwa ban leit buh syntiew bad ba la shim bynta ruh naduh ki khynnah skul bad ki nonghikai katei ka shlem pule ka JNV, Niangbari.
Hadien ka jingïalang, kine ki nongïalam seng ha ryngkat ki nonghikai bad ki khynnah skul, ki la bteng ban leit buh sa da ki syntiew ki skut ha u Mot Sah jingkynmaw u Tirot Sing Syiem, kaba don ha phyllaw ka JNV Niangbari, kaba ki ai burom ïa une u riewkhraw uba la len lade ban ïada ïa la ka jaid bynrirew.
Haba kren ha kane ka sngi, kitei ki nongïalam ka seng KSU bad FKJGP, ki la phah ïa ka khubor ba kum ka jaid bynriew ka dang donkam shibun ki samla kiba shynrang ka mynsiem bad kiba kloi ban len lade na ka bynta ka jaid bynriew bad kum ki samla ki hap ban bud ïa ka nuksa u syiem Tirot Sing, uba dei uwei u khlawait ka jaid bynriew uba la len ïa lade tang ban im ka jaid bynriew.
Shuh shuh, kitei ki nongïalam seng ki la ai mynsiem ruh ïa ki khun samla ka juk mynta ba ki dei ban trei shitom ha ki jingpule ban poi sha ki kyrdan kiba shaneng bad kum ki samla ki hap ruhban don kata ka jingkitkhlieh ban ïada kyrpang ïa ka jaid bynriew bad ruh ban don kata ka mynsiem shlur ban ieng ïaleh na ka bynta ka dawbah jong ka jaid bynriew.
