Kynmaw burom ka jylla ïa ki nongïaleh laitluid ka ri India kiba la aiti la ka jingim

Shillong, K’Lyngkot 30: Ka jylla Meghalaya kumba long lem kiwei ki jylla ka ri India, ha ka sngi Thohdieng kala ïa snoh kti lang banrakhe ïa ka 78th Martyrs Day da kaba ïa ki nongialeh laitluid kiba la aiti la ka jong ka jingim ban ioh jinglaitluid ka ri India bad ruh ban kynmaw burom ïa ka sngi ïap u Mahatma Gandhi.
Ha ka nongbah jong ka jylla, ki heh ophisar ba la lam khmat da u Principal Secretary u Bah F.R. Kharkongor u la leh burom da kaba buh syntiew ha u mot jong u Mahatma Gandhi ha Main Secretariat.
La pynsawa ïa ka siren ha ka por 10:59 baje mynstep, hadien kata baroh ki kam, ki kali bad ka jingleit jingwan jong ki paidbah, ki la sangeh noh shipor namar ba ki la pynlong peit ka jingsngap jar kaba ar minit ha ka por 11 baje mynstep.
Kum shi bynta ban rakhe ïa kane ka sngi, ka All India Radio ka la pynsangeh noh ïa ki jingpynbna jong ka ha ka por ba pynlong ïa ka jingleh burom.Ka jingsawa kaba ar ha ka por 11:02 baje mynstep ka la pynkut noh ïa ka jingsngap jar kaba ar minit.
Ïa ka Martyrs’ Day la rakhe man la u snem ha kylleng ka ri ban burom ïa ki jingaiti ba khraw tam jong ki nongïaleh laitluid bad ban kynmaw ïa ka pateng kaba sah jong ki.