Shillong, Naitung, 23: Ka John Roberts Theological College, Mawklot ha ka sngi Saitjain ka la rakhe kynmaw burom ïa ka lyngkhuh sngi ïap kaba 115 snem jong u Rev. Dr. John Roberts uba long u kpa jong ka thoh ka tar Khasi.
Ha kane ka sngi, ka Prof Esther Syiem kaba dei ka nonghikai jong ka English Department, NEHU ka la ai jingkren kaba bniah bha halor ka phang, ‘Voices of Resistance: Literature in English from North East India.”
Shwa kane, u President jong ka Governing Body u Rev. C. Syiem, u Principal u Rev. Dr. BL Syiem, ka Prof. Esther Syiem, bad u Bah P. Kharshiing uba mihkhmat ïa ka Khasi Author Society (KAS) lem bad kiwei kiwei kiba la shah khot sngewbha ki la leit buh syntiew hakhmat u durmot jong u Rev. Dr. John Roberts uba don ha phyllaw jong kane ka jaka pule.
La kha ïa u Rev. Dr. John Roberts ha Ri Wales ha ka shnong Corris ha u snem 1842 hadien shisnem ka jingpoi jong u Thomas Jones I ha Ri Khasi.
U la wan poi ha Ri Khasi hajan bakut jong u snem 1871. Une u mishoneri u la shakri ha Ri Khasi kumba 37 snem tam. U la khlad na kane ka Pyrthei ha ka 23 tarik, Naitung, 1908 ha ka rta kaba 66 snem. La tep ïa u ha u lum jingtep jong ka Balang Presbyterian, Nongsawlia
Tang shu poi ha Ri Khasi la phah ïa u ban trei ha Shella kaba long ka lyngkha trei bathymmai jong ka mission ha kato ka por ha kaba u la trei kumba 5 snem hapdeng bun ki jingeh.
Dei ha u snem 1876 u la wan poi sha ka shnong Nongsawlia bad u la shimti ban peit ïa ka kam skul. U la shimti ban pynïaid ha la ka tyrpeng ïa ka kam shakri bakhraw ha ka thoh ka pule kum u nongpynïaid ïa ka Normal School, namarba u Rev. Hugh Roberts uba long u Headmaster jong kane ka Skul naduh u snem 1867-1875 un leit jynduh noh sha la ka ri ha ka snem 1876. Ïa kane ka Normal School hadien la tip ïa ka kum ka Cherra Teacher’s Training Centre naduh ka snem 1947 ïa kaba la seng da u Rev. Thomas Jones ha ka snem 1865.
Nalor ka kam ban peit ïa ki kam skul, u la hikai ruh ïa ka subject Khasi bad ka Literature.
U Soso Tham u dei uwei na ki khynnah skul ba paw bha jong u Rev. Dr. John Roberts.
