Jowai, Lber 22: Ka seng jong ki longkmie kaba la tip kum ka ‘Hynñiewtrep Women Welfare & Development Organization’ (HWW&DO) mynta ka sngi kala kynmaw burom ïa ka jingdap shi (1) snem pura ka jingïaid lynti na ka bynta ban ai ka jingshakri ïa ka ri bad ka jaitbynriew.
Mynta ka sngi ïa ka jingïalang la pynlong ha Ladthadlaboh Community Hall, ha kaba u MLA barim jong ka sorkar jylla ma S. Mulieh ula long kum u kongsan, ha ryngkat ka jingdonlang u MDC ka JHADC ma Dawan Lyngdoh, ka kong I. Kharpran Women Police Sub-Inspector Jowai, u Adviser ka seng ma C. Sungoh, ki nongïalam ka JSU, JSM bad kiwei de kiba la shah khot sngewbha.
Na ka liang ka President ka kong Oibarly Suchiang kaba la pynsngew ïa ki nongrim baskhem jong ka HWW&DO naduh ba la seng ïa ka haka 19 tarik Lber 2021 bad haka jingïaid lynti ka seng ka la ïoh ban leh shibun ki kam ba bha hapoh ka imlang ka sahlang.
U ma S. Mulieh haba ai jingkren ha kane ka sngi ula ai ka jingïaroh ïa kane ka seng ki longkmie kaba la lah ban ïaidlynti haduh shi snem pura, ula ai mynsiem ba ki longkmie hapoh ka jylla ba ki long kiba kyrpang eh namar ïa ka jait ka kynja la ai pateng ha ka longkmie kaba long ka nongpeit ïa ka ïing ka sem.
‘Niar eh ban shem kum kane ka jingpynkup bor ïa ki kynthei hapoh ka Ri hi baroh kawei’, ong u ma Mulieh kumba ka donkam haduh katta ban burom ïa ka longkmie namar dei ma ka ka nongri nongsumar bad ka nongai jinghikai ïa ka longbriew manbriew. Ula ong ba kum ki longkmie kiba stad ki lah ruh ban ïashim bynta lang ha ka imlang ka sahlang bad haka shynshar ka khadar.
Na ka liang u ma Mulieh ula kular ban ïatreilang bad katei ka seng ha kino kino ki bynta lada ki donkam jingïarap ban leit ïa kynduh ïa ki myntri sorkar ka jylla lane wat shaduh u myntri rangbah duh ka Ri.
Baroh kiba ïa jingkren ha kane ka sngi kila ai mynsiem ïa katei ka seng ki longkmie ba kan nang ïaid shakhmat ha ka jingshakri khlem ka kynrad dien namar kiba bun ki nongshong shnong khamtam ki longkmie ki dang donkam jingrap shibun eh bad ka long ruh kaba jem ban pan jingïarap na ki para longkmie. Ha kane ka sngi u kongsan ha ryngkat ki nongïalam ka seng kila ïoh ruh ban ot ïa u Cake jong ka jingdap shi snem pura ka jingïaid lynti.
