Nongstoiñ, Nohprah 13: Ka Hima Nongstoiñ lyngba ka Nongstoiñ Memorial Celebration Committee, mynta ka sngi ka la pynlong ïa ka jingkynmaw burom ïa ka lyngkhuh sngi ïap kaba 58 jong u Paiem Sibsing Syiem u Syiem ka Hima Nongstoiñ.
Kum ka dak jong ka jingkynmaw burom, na ka liang jong ka Hima ka la pynlong ïa ka jingïalang kaba lyngkot, da kaba pynlong ruh ïa ka jingsngap jar kaba shi minit bad bteng pat sa ka jingbuh ïa u syntiew ruh ha u mot sah kynmaw jong u Paiem Sibsing Syiem, u ba don ha phyllaw jong ka ophis u Syiem ka Hima Nongstoiñ.
Ha kane ka sngi ba kyrpang, la sakhi lang da ka jingïadon ryngkat lang u Paiem E.P Syiem, Syiem ba mynta ka Hima Nongstoiñ, u Paiem R.K Syiem Syiem Khynnah ka Hima Nongstoiñ, ki nongsynshar shnong ka kur Syiem ki riew rangbah bad kiwei kiwei.
Haba ai jingkren ha katei ka jingïalang kaba lyngkot na ka liang jong u Paiem E.P Syiem, Syiem ka Hima Nongstoiñ, u la pynkynmaw ba u Syiem Sibsing Syiem u dei u ba pass tang ïa ka klas 8, hynrei hynrei u la long u Syiem u ba stad bad ba shemphang bad u la long ruh u nonghikai skul.
U la ïathuh ruh ba dei u Syiem Sibsing u ba la pynshlur ïa ka Hima Nongstoiñ ban plie noh ïa ki skul ME ha Nongstoiñ bad sha kiwei ki jaka jong ka Hima. Nalor nangta u Syiem Sibsing u la ïoh kyrteng ha ka skul Sibsing kaba don ha Nongpyndeng. Mynta pat u ne u Syiem u la ïoh kyrteng biang sa ha ka IB jong ka PWD lyngba u MLA ka Nongstoiñ u bah Macmillan Byrsat.
Shuh shuh, u la pynkynmaw ruh ba u Syiem Sibsing katba ym pat dep shong da ka Dorbar Hima, um treh ban soi ïa ka instrument of accession bad dei na kane ka daw ba katba u dang thmu ban leit jingïaseng, u la shah kem noh hapdeng lynti ha ka shnong Markasa, namar ba ki shipai phareng ki dang mut ba u la phet bad hadien ba pynbiang nadong shadong ha ka 19 tarik u Ïaiong 1948 u la soi ïa ka instrument of accession bad annexed agreement.
