Shillong, Naitung 30 : Ka Conference of Religious India (CRI), Shillong unit ha ka 27tarik mynta u bnai ka la leit jngoh ïa ki riewtymmen riewsnam kiba sah ha Mercy Home ban rakhe ïa ka sngi kyrpang jong ki ba la tip kum ka ‘Day for the Elderly and Granparents’.
Kane ka jingleit jngoh ka long ruh kum shi bynta jong ka jingrakhe ïa ka Snem Jubili 2025, da kaba buh hakhmat ïa ka mynsiem sngewnguh bad ka burom ïa ki riewtymen riewsan.
Ïa kane ka prokram la pynïaid da i Sr. Chiruplang Swer SCCG na St.Edmund’s College Laudato Si’ Society nalor ka jingai ïa ki jingrwai, ki jingdawai bad ka khubor ha ka ktien Hindi, Khasi bad Engish. Ka jingwan shim bynta lang da ki samla pule jong ka Stephan Hall, ki samla pule jong ka Auxilium, samla pule pule ba sah hostel ha Loreto bad kito kiba sah ha Mercy Home, ka la nang pynphuh shuh shuh ïa ka prokram.
Ha kane ka jingïalang, u President ka CRI u Br. Sunil Britto CFC u la ai ruh ïa ki kyntien pynkmen bad ai mynsiem ïa kine ki riewtymmen riewsan.
“Teng teng ngi tip ba ka jingsngewkynjah sngew marwei bad sngew tlot ka met ka ktah ïa ka mynsiem jongphi, hynrei barabor pat kynmaw ba u Blei u la ieid kyrpang ïa phi bad da ngi baroh kiba don hangne. Ki khana bad ki jingngeit jong phi, bad kumjuh ki jingduwai ki dei ki jingai mynsiem kiban ai mynsiem bad pynthaba ïa ka jingim jong ka pateng ban wan,” u la ong.
