Nongpoh, Lber 08: Ban rakhe bad pynpaw ïa ka burom jong ka Sngi ki Longkmie, ka Meghalaya BJP Mahila Morcha ka la pynlong ïa ka jingrakhe International Women’s Day ha Nongpoh ryngkat ki longkmie bad ki kynthei na ka thaiñ Ri-Bhoi.
Ha kane ka prokram la sakhi ruh da ka jingdonlang ka President ka Mahila Morcha ka jylla, ka Kong Susuki Pariat, ka kong Darihun Marbaniang, Marian Maring, Sumitra Laloo bad kiwei kiba la ai jingkren shaphang ka jingpyrshang ba u Myntri Rangbahduh ka Ri, u Narendra Modi, ban pynkupbor bad pynkiew ïa ka jingim ki kynthei ha ka ri baroh.
Ka Kong Susuki Pariat ka la pynpaw ïa ka jingsngewnguh ïaka jingieit jong u Myntri Rangbah ïa ki longkmie ka jylla Meghalaya. Ka la ong ba ka BJP ha ka sorkar pdeng bad jylla ka la pyndep ïa ki jingthmu ban pynkupbor ïa ki kynthei jong ka Meghalaya. Ka la kyntu ruh ïa ki kynthei ba kin ai jingkyrshan ïa ka party ban pynriewspah ïa ka jingim jong baroh ha ka jylla.
Ka la pynkynmaw shuh shuh ïa ki skhim bapher bapher ba ka sorkar pdeng ka la mang kyrpang naka bynta ki kynthei bad kyrpad ba ki dei ban shim kabu ïa kine ki skhim kiba la wanrah da ka sorkar pdeng naka bynta ka jingmyntoi jong ki.
Kiwei ki longkmie ba kham paw kiba don lang ha kane ka sngi ki kynthup ïaka Kong Iaishah Rymbai, nongseng ka Eriweave Pvt Ltd bad President jong ka Cluster Level Federation, Bhoirymbong (hapoh NRLM), ka Kong Pinky Maring, Mrs World Peace & Beautiful Skin, Ex-Miss Meghalaya bad Ex-Miss North East, bad kiwei kiwei.
