Shillong, Nohprah 07: Khasi Students Union Sengkmie ha ka sngi U Blei ka la pynlong ïa ka jingïalang kynmaw burom bad kumjuh ruh ka jingpyndon burom ïa ka Lyngkhuh sngi ïap ba 31 snem jong u Bah Bull. N Lyngdoh uba la long u nongïalam ba ratbah jong ka seng bad khamtam eh jong ka jaitbynriew Khasi.
Ha kane ka jingïalang kaba lyngkot la ïoh ban pynlong ïa ka jingïasngap jar ba shi minute kum ka dak ban kynmaw burom ïa une u nongïalam ka Seng uba la pynpaw ruh ïa ka jaitbynriew Khasi halor ki jinglong shlur jong ka.
Hadien kane ka jingsngap jar kaba long kum ka dak ban burom ïa une u nongïalam bakhraw jong ka seng, la lah ïoh pat ka jingbuh syntiew na ki nongïalam ka Central Executive Committee (CEC) bad kiwei kiwei de ki nongïalam jong ki Circle bad Unit bad ki unit bapher bapher.
Ki Nongkren ha kane sngi ki kynthup na Hynmen Bah Bull, I kong Hana Lyngdoh. Na ka liang ki nongïalam ka seng pat kiba ai jingkren ki kynthup ïa u President KSU Malki Circle, Bah Iashan Mukhim, ka jingkren na u President KSU NEHU Unit, Robin Nongrem, nangta na u Samla Franklin Syiemiong, General Secretary KSU West Khasi Hills District, nangta na u Bah Biangbor L. Paliar, Vice President KSU, Sengkmie bad khatduh ïawai pat la ïoh ka jingkren na u Bah Lambok S. Marngar, President KSU Sengkmie.
Ha kane ka prokram bad ka jingïalang kaba lyngkot la pynïaid da u Samla Raymond Kharjana Organising Secretary jong ka KSU Central Executive Council.
