Nongpoh, Ïaiong 18: U Kiren Rijiju uba dei u Myntri sorkar pdeng ba dei peit ïa ka Law and Justice mynta ka sngi u la wan ban iuhkjat ha Ri Bhoi District kum kawei na ‘Aspiration District’ nadpeng ki 112 tylli ki District kiba la shah jied hapoh ka ri India, na ka bynta ban peit pyrman ïa ki kam pynroi kiba la pyntreikam kum kata ka Aspirational District hapoh ka jylla Meghalaya.
U Myntri ka sorkar pdeng, u Kiren Rijiju haba wan iuh kjat mynta ka sngi ha Ri Bhoi u la ïa kynduh ïa ki ophisar sorkar na ki tnad treikam bapher bapher ha ka jingïalang (Review Meeting) kaba la long ha Conference Hall ka ophis u Deputy commissioner ka Ri Bhoi ha Nongpoh.
Ha kane ka sngi na laor ki ophis sorkar na ki tnad treikam bapher bapher kiba la shim bynta ban ïa kynduh lang bad une u Myntri sorkar pdeng, la don ryngkat ruh u Deputy commissioner ka Ri Bhoi, u Arpit Upadhyaya, u SP ka Ri Bhoi, u Giri Prasad bad kynthup ruh u Additional Deputy Commissioner ka Ri Bhoi, u Bah M.B Tongper uba la pynïaid ai ka jingbatai halor ki jingpyntreikam ïa ki skhim bapher bapher lyngba kita ki kam pynroi ba la wan rah da ka sorkar pdeng kum kata ka Aspirational District ha ka jylla Meghalaya.
Ha kane ka jingïakynduh lang na ka liang u myntri sorkar pdeng u la ïoh lad ruh ban ïa kren bad ki ophisar bapher bapher halor ka jingpyntreikam ïa ka thong jong kata ka Aspirational District bad na ka liang ka bor synshar District ka la pyni ruh lyngba kata ka Slide presentation kaba dei shaphang ka jingpyntreikam ïa ki kam pynroi bapher bapher kakum ka thong jong ka sorkar pdeng ba la ithuh ïa kita District kum kita ki Aspirational District.
Haba kren bad ki lad pathai khubor hadieng katei ka jingïalang (Review Meeting) ka Aspiration District, u Kiren Rijiju kum u myntri sorkar pdeng u la pynpaw ka jingkmen bad ka jinghun ban wan jurip ïa ka Ri Bhoi District, kaba dei katkum ki kam ba la leh da kane ka District ban kynjoh sha ka thong jong ka sorkar pdeng ba la ithuh ïa kane ka Ri Bhoi District kum kata ka Aspirational District.
U la ong ruh ba ki tnad sorkar bapher bapher ka Ri Bhoi ki la trei shitom shisha ban poi sha kata ka thong jong kane ka Aspirational District, ha kaba tang ha u snem 2018 ka Ri Bhoi District ka don ha ka kyrdan kaba 51 bad namar ka jingtrei shitom ki ophsiar mynta ka la poi sha ka kyrdan kaba 5 napdeng ki 112 tylli ki District kiba biang tam ha kaba pyntreikam katkum ka thong jong ka sorkar pdeng ba la ithuh ïa kane ka District kum kata ka Aspirational District.
U la ong ruh ka jingthmu ba ka sorkar pdeng baka la ithuh ne jied kum kita ki Aspirational District ka dei ka thong ban wan rah ka jingkylla bad ban kiew ha ka liang ka ïoh ka kot jong ka ri hi baroh kawei bad na ka liang u Myntri Rangbah ka ri, u Narendra Modi u la wan rah ïa kane ka thong ruh ka long ban poi sha kata ka thong ba ka ri India kan kiew shaphrang ha ka ïoh ka kot kaba ki tip kum kata ka Trillion Economy.
Namar kata, u la ong ruh ba ka ri India ha ka jingïalam u Myntri Rangbah, u Narendra Modi ka don ïa ka thong ban pynlong ïa ka ri India kaba thymmai bad kaba kiew shaphrang ha baroh ki liang bad ban poi sha katei ka thong dang donkam ba ki ophisar kin trei borbah bad kumjuh ruh ban don ka jingïatrei lang na ka liang ki paidbah ban poi sha kata ka thong ba ka sorkar pdeng (NDA Government) ka angnud ban pynlong ïa ka ri India kaba kiew shaphrang ha baroh ki liang, u la bynrap.
Ha kane ka sngi, na ka liang u Myntri ka sorkar pdeng, u Kiren Rijiju hadieng ka jingïakynduh lang bad ki ophsiar sorkar ha Nongpoh, u la leit ruh ban jurip ïa ka Aganwadi Centre ha Umdihar bad ruh ïa ka Health and Welness Centre ha Umsawnongkharwai ban ai mynsiem ïa ki ophisar sorkar ba kin dang trei shithrem ban ai ka jingshakri kaba paka tam na ka bynta ki paidbah khnang ba baroh ki jingangnud ka sorkar pdeng kan long kaba jop kaba ai jingmyntoi ïa ki paidbah ha ka ri hi baroh kawei.
