Shillong, Risaw, 17: Ka Mang Hai Ryum Higher Secondary School, Amlarem, West Jaiñtia Hills ka la rakhe ïa ka Jubili Rupa ha ka sngi Thohdieng ha ka jingïaid lynti kaba la 25 snem kynthih ban kyntiew ïa ka pule puthi ha ka imlang sahlang.
Ha kane ka sngi la sakhi lang da u Myntri ka tnat Pule Puthi ka Sorkar Jylla u Bah Lahkmen Rymbui uba la long kum u kongsan, ki ar ngut ki MDC ka Jaiñtia Hills Autonomous District Council kiba kynthup ïa u Bah Jamshaphrang Pohtam bad u Bah Medling M. Swer kiba la long kum ki Symbud Kongsan, a In-Charge Sub-Divisional School Education Officer (SDSEO), Amlarem Sub-Division ka Kong Deibor Patrecia Lytan, u Block Development Officer (BDO), Amlarem C&RD Block Dr. D. Lyngdoh, ki ophisar sorkar, ki nongïalam shnong, ki kmie ki kpa, ki nonghikai bad kiba la shah khot sngewbha.
Shwa ban sdang ïa ki prokram bapher bapher la pynlong ruh ïa ka jingsngap jar kaba shi minit ban kynmaw burom ïa ka nongseng jong ka skul ka (L) Kong Aiom Pyngngad Pamthied, ka jingleh burom, ka jingpyllait paidbah ïa ka Commemorative Silver Jubilee Stone Tablet bad ka jingot ïa u cake jubili.
U Bah Lahkmen Rymbui haba kren kum u kongsan u la ai ïa ka jingïaroh ïa ka ïing jong ka nongseng skul kaba long ka nuksa jong ka jingsngewrit bad ka jingieit ïa ka kam, bad u la ong ruh ba lada tang 10% jong ki 55,000 nonghikai ha ka jylla ki don ïa ka jingïohi bad ka jingangnud kum kane ka skul, ka pule puthi ha Meghalaya kan kylla.
U Myntri u la pynbna ruh ïa ka thong jong ka Sorkar ban pynbeit ïa ka rukom ai tulop jong ki nonghikai ha ka jylla tang ar kyrdan, kata, tang ïa ka Grant-in-Aid bad ka Government Salary. U la ong ba ka Sorkar ka la buh thong ban pynurlong ïa kane ka jingthmu hapoh u Nohprah 2025.
U la pynpaw ka jingsngewkhia halor ka jingduna ki khynnah pule ha ki skul sorkar hapoh ka Amlarem Sub-Division bad u la kyntu ïa ki nongïalam shnong ba kin shim bynta ban kyntiew ïa ka pule puthi bad ban pynkhlaiñ ïa ki skul ha ki shnong ki thaw.
U Myntri u la pynbna shibun ki jingïarap sha ka skul, kynthup ïa ka song T.15 lak lyngba ka Chief Minister’s Special Development Fund (CMSDF), T. 10 lak na ka bynta ka jingpynkhlaiñ ïa ki jaka pule bad jingtei, bad ar tylli ki Maruti Eeco Van na ka bynta ban kit ïa ki khynnah skul.
U la pyntip ruh ba ïa ki work order yn sa ai ha ka sngi ba u Myntri Rangbah ka jylla u Conrad K. Sangma un sa wan jngoh ïa ka Amlarem ha ka 12 tarik, Naiwieng, 2025, ha ka jingrakhe 50 snem ka Amlarem Sub-Division.
U Principal jong ka skul u Bah Tyrmei Chynnam Pamthied, u la ong, “da ka jingisynei jong U Blei ngi ieng, bad na ka bynta ka Burom jong U ngi tynshaiñ.”
U la kynmaw ïa ki por ba dang sdang ïa ka skul kaba dang dei tang ka ïing tin bad kawei ka kamra klas ban ai jinghikai hynrei mynta ka skul ka la kynjoh sha thup kaba 100% ka pass percentage ha ka SSLC 2025.
U Principal u la ai burom kyrpang ïa ka (L) Kong Aiom Pyngngad Pamthied, ka nongseng ïa ka skul, da kaba pynpaw ïa ka kum ka nonghikai kaba trei wat haduh ka por mynmiet ban pynbiang ïa ki jingdonkam hapoh ka skul bad ban ai jingïarap ïa ki khynnah kiba duna ka ïoh ka kot..
La pynshongkun ïa kane ka jingrakhe jubili da ki jingshad tynrai Khasi, Jaiñtia, Garo bad Manipuri, kiba pyni ïa ka jingriew spah ka kolshor jong ka jylla Meghalaya.
Ki bor pynïaid skul ki la pynkup burom ruh ïa ki nonghikai barim, ïa ki samla pule ba kham paw bha ha ka jingpule bad ki nonghikai ba dang trei mynta.
