Kynjoh 23 snem ka SS Katholik Assisi Parish Byrnihat

Nongpoh, Nailar 26: Kum shibynta ban rakhe ïaka jingkynjoh ïa u maw mer uba 23 jong ka Seng Samla Katholik Assisi Parish Byrnihat, na ka liang ka SSKAPB mynta ka sngi ka ioh ban plie ïaka Sports Meet ba ar sngi ka ba la pynlong ha madan ïalehkai jong ka Parish Byrnihat.
Ïa kane ka Sports Meet jong ka Seng Samla Katholik Asisi Parish Byrnihat lawan ban plie pyrda da u bah Liander Nongshli u Assistant Secretary jong ka RBYF uba la shim ïaka bynta kum u kongsan, haka jingïadon bynta lang da u Fr. Anil kum u symbud kongsan, u Ajoy Lyngdoh, President jong ka SSKAPB bad kiwei kiwei ki dkhot jong ka SSKAPB bad ki riew rangbah.
Ha kane ka sngi plie ïa katei ka Sports Meet la ioh ban pynïalehkai ïaka jingïalehkai phutbol jong ki shynrang bad ka jingïalehkai mawpoint jong ki kynthei. Ha ka jingïalehkai football ka jingïakhun kala long hapdeng ka Kongripara pyrshah ïaka Arphewmer B bad ha katei ka jingïakhun ka Kongripara kala lah ban pynliem noh ïaka Arphewmer B da 4 la 5 kol, katba haka jingïalehkai mawpoint jong ki kynthei pat ka Balang Shnong Umtyrnga ka la lah ban pynliem noh ïaka Lum Nongthymmai Byrnihat nalor kiwei kiwei ki jingïalehkai kiba kynthup ïaka Air gun Shooting, ka wang Ring, ka jingsiat khnam, ka Arm Wrestling, bad ka jingïakop shad bad rwai.
Na ka liang u bah Liander Nongshli, u la pynpaw ïaka jingsngew kmen ban ioh ïa kane ka bynta ban ïadon lang bad ki khun Samla jong ka Balang Katholik ban rakhe ïa kane ka jingdap 23 snem, u la ong ruh ba kum ki Samla kidei ban long kiba don ïaka jingkit khlieh khnang ban wanrah ïaka jingkylla hapoh ka balang bad kumjuh ïaka ri bad ka jait bynriew.