Kynjoh 176114 ngut ki nongthep vote ha ki saw tylli ki Constituency hapoh ka WJHD

Jowai, K’Lyngkot 25 : Ka ophis u Deputy Commissioner, Election Branch, West Jaiñtia Hills kala rakhe ïa ka sngi nongthep vote ne ka ’16th National Voters Day’ hynnin ka sngi Thohdieng ha phyllaw ka ophis treikam ka Election Branch. La sdang ïa kane ka prokram da kaba pule ïa ki jingkular ba la ïalamkhmat da ka Additional Deputy Commissioner ka kong DV Lyngdoh, MCS.
Ha kane ka sngi la rakhe ïa ka National Voters Day da ka jingwan ïashim bynta lang ki riew rangbah, ki nongthep vote ba nyngkong, ki ophisar na ki tnad treikam bapher bapher bad ki nongtrei jong ka Election Branch, nalor ka jingdonlang u Dalloi ka Elaka Jowai ma Puramon Kynjing, ka Election District Icons samla Sawakani Lakiang bad u Aleksander Lyndoh. Napdeng ki ophisar kiba don lang ki long ka kong B Blah, Additional Deputy Commissioner, ma F.Passah, u Assistant Commissioner bad ka kong P. Passah, DIO, NIC.
Haba ai jingkren sha ki paidbah, ka kong D V Lyngdoh kala pyntip namar ba ka 25 tarik ka hap haka Sngi U Blei, kumta ki bor pynïaid District ki la rakhe noh ïa ka National Voters Day mynta ka sngi 23 tarik. Shuh shuh kala pynpaw ïaka jingthmu ba kongsan jong kane ka sngi ka long ban pynshlur bad ban pynsuk ïa ka rukom pynrung kyrteng ïa ki nongthep vote bad la kyntu ban ïashim bynta ha ka election ban jied ïa ki nongmihkhmat.
Ha kane ka sngi la sam ïa ki Voter ID card sha ki Voter kiba dang shu pynrung kyrteng thymmai bad la sam ruh ïa ki khusnam sha ki nongjop ha ka jingïakop dro dur ba la pynlong haka 22 tarik u Kyllalyngkot, 2026.
La ïoh jingkheiñ ki nongthep vote thymmai kiba la pynrung kyrteng ha ki saw tylli ki Contituency jong ka District ki long 4239 ngut bad la leh burom ïa ki hala ki jong ki jong ki Polling Stations da ki BLO.
Hapoh ka 1- Nartiang Constituency baroh ki nongthep vote thymmai ki long 1123 ngut, na kine 572 ngut ki dei ki shynrang bad 551 ngut ki dei ki kynthei.
Hapoh ka 2- Jowai Constituency la pynrung kyrteng thymmai haduh 970 ngut, na kine 488 ngut ki dei ki Shynrang bad 482 ngut ki dei ki kynthei.
Hapoh ka 3-Raliang Constituency baroh ki don 1016 ngut ki nongthep vote thymmai, na kine 524 ngut ki shynrang bad 492 ngut ki kynthei.
Hapoh ka 4-Mowkaiaw Constituency baroh ki nongthep vote thymmai ki long 1130 ngut, na kine 541 ngut ki shynrang bad 589 ngut ki kynthei.
Ka jingdon ki nongthep vote baroh ha ki saw tylli ki Constituency (Nartiang, Jowai, Raliang bad Mowkaiaw) ka la poi sha ka 176114 ngut ki nongthep vote (84748 ngut ki shynrang bad 91366 ngut ki kynthei)