Jowai, Nailur 29: Ka Khynroo Khyllood Chilliangraij Niamtre Committee kawei na ki tnad treikam ka Dorbar Chnong Chilliangraij Jowai kaba pynkhie im ïaka nongrim ban pynneh pynsah ïa ka ñiam ka dustur katkum bala ïoh hikai naduh ki longshwa manshwa.
Ha kane ka 28 tarik ha ka jingsakhi lang ki khun ka ñiamtre bad na kiwei de ki dong kila pynlong ïa ka jingïakynduh lang ha ‘Yungwalieh’ kum ka dak ban leh burom ïaka lyngkhuh snem ba 13 snem ka jingshakri haka jingïaid lynti ka Khynroo Khyllood Chilliangraij Niamtre Committee.
La wan ban sakhilang ha kane ka sngi da u ma E.M.H. Passah, Vice-President Seiñraij Jowai, u Arwotki Sumer, General Secretary Seiñraij, u Wyraiki Kharbukhi, Asst. General Secretary Seinraij, u ma Khroo Lamsalanki Pariat, President KYM, ki riew rangbah, ki longkmie bad ki khun samla na ki dong bapher bapher.
Ïa ka jingïalang la pynïaid da u ma D.H. Pde, Waheh Chnong Chilliangraij, la ïoh ka ngoohblai ngoohsyiem na u samla Budwanmi Dkhar, ka jingkren lyngkot naka Chanlang Pde bad naka samla Iarika Lanong, katba ka Hanlada Rngad, Secretary KKCNC kala ai ki kyntien khublei.
U ma Chanlok Dkhar kum uwei na ki riew rangbah ka Chilliangraij ula ong ka jingim Tipbru-Tipblai, ka Kamai ïaka Hok, ka Tipkur Tipkha bad ka Sngi Kylliang ka Nongkylliang ka long kaba konsan eh ban seng ïaka nongrim jong ki khun u Hynñiewtrep Hynñiewskum. Kumta u ong kum ka pateng jong ka juk dei ban sngew sarong bad donkam ban pynjanai shuh shuh ïaka lynti kaba ïadei bad ka mon u Trekirot.
Na ka liang u ma Wyraiki Kharbukhi haka jingkren kum u kongsan jong kane ka sngi ula ai mynsiem ïa ki khun ka Dorbar Chnong Chilliangraij ban long kiba don ka jingkitkhlieh ïala ka kamram kum ki khun ka ñiamtre, ula ong kumba la seng ïaka dong haka nongrim ryngkat bad ka ñiam ka rukom kum ka pateng ba mynta dei ban burom ban kheiñkor ïa ka tynrai la jong khnang ba kan nym jah lynti.
La pynphuh pynphieng shuh shuh ïa kane ka sngi da ki jingshad, ki jingrwai bala shim bynta da ki khun samla ka shnong Panaliar, KKC Seiñraij Jowai bad ki khun ka Shnong Chilliangraij.
