Kynjoh 100 snem ka jingshakri ka JPHSS ban bsa ia ki umpohliew jingstad ïa ki khynnah

Shillong, Naitung 27: Ka Jaïaw Presbyterian Higher Secondary School ka la ïoh ban pynkut noh ïa ka jinglehkmen dap 100 snem jong ka skul.
Ha katei ka sngi la donlang u Bah Metbah Lyngdoh MLA ka Mairang, u MLA ka Jaïaw u Bah Adelbert Nongrum, u Rev WC Khongwir President Managing Committee, kiwei kiwei pat ki pastor ki nonghikai, ki khynnah school.
Haba ai jingkren ha kane ka jingïalang na ka liang u Bah Metbah Lyngdoh u la pynpaw ka jingsngewnguh ïa ka School kaba la khot sngewbha ïa u ba un long kum u kongsan ha kane sngi ha kane ka jingpynkut ïa kane ka jingrakhe kaba la neh shisnem.
U la ong ruh ha u snem ba la dep ka dei ka sien kaba nyngkong ba u la rung ha kane ka phyllaw skul hadien ka jingïapher kaba kumba 48 ne 49 snem. Ha kane ka sngi pat, u la ïoh rung ha kajuh ka jaka skul, hynrei ym na kajuh ka khyrdop kaba nga ju rung ha 50 snem mynshuwa.
U Bah Metbah u la pynkynmaw ïa ki por jinglong khynnah jong u, ha kaba u dang long u khynnah jong kane ka school u la ïoh ïa ka admission ha ka klas kaba nyngkong bad ban kynmaw ruh ïa baroh kiei kiba u la mad ha kane ka skul.
“Kadei kajuh ka kmie ha ïing kaba la hikai ïa nga kumno ban ïaid bad hikai. Ka dei kajuh ka kmie ha ka kamra klas kaba la hikai ïa kumno ban pule bad thoh,” ong u MLA ka Mairang.
U la ba kadei kajuh ka kmie hadien ba la dep skul, ha ka por mynsngi ne ha ka por janmied, kaba la jia ryngkhat ba ka long ka nonghikai jong u ha kito ki sngi. U la ong ruh ba teng teng u la pynpaw ka jingsngewsih ba ka kmie jong u ka long kum ka nonghikai ha skul bad kum ka kmie ha ïing. U la ong ba ha kane ka sngi u la long uba donbok shibun bad u ba la kyrkhu ba u la ïoh ïa ka kmie ba shisha jong u.
U Bah Metbah ha kane ka sngi u la ai ruh 5 lak Tyngka kum ka jingai sngewbha sha ka School bad kumjuh ruh kum ka jingkynmaw ïeid ïa ka kmie jong u kaba la khlad noh bad na ka liang ki hynmen bad para jong u.
Ha kane ka sngi la sdang da ka jingduwai na u Tbn J S Cajee, la ïoh ka jingkren pdiang na u Rev WC khongwir, la ïoh ruh ka jingrwai kyrpang na ki nonghikai ka Jaïaw Presbyterian higher secondary school bad na ki khynnah jong kane ka school.
La ïoh ruh ka jingpynkupburom ïa ki khynnah kiba wan shakhmat ha ki exam SSLC bad HSSLC bad ïa ki headmaster bad ki headmistress jong kane ka school kiba la shongthait bad la pynkut da ka jingkyrkhu pynwai na u Rev O P Pathaw.