Kynduh u Conrad ïa u Modi ban kyntiew ïa ki kam pynroi ka jylla ha shwa u 2032

Shillong K’ Lyngkot 29: U Myntri Rangbah ka jylla U Conrad K Sangma u la ai ïa ka jingthoh sha u Myntri Rangbahduh ka ri India u Narendra Modi ha ka jingïakynduh ha ka sngi Palei ha Nongbah Delhi bad ha kane ka shithi kaba la ai kadei na ka bynta ban pan ïa ka jingkyrshan na ka sorkar pdeng ban kyntiew ïa ka jylla ha ki kam pynroi shwa jong u snem 2032, kane ka long ban pynpoi sha ka thong katkum ka jingangnud ban pynlong ïa ka Ri India ka Viksit Bharat.
Ha kane ka jingïakynduh u Myntri rangbah ka jylla u la ai khublei ïa u Myntri Rangbahduh jong ka Ri ha ka kyrteng jong ki paidbah ka jylla ban pynpaw ïa ka jingsngewnguh ba u la ai khublei ïa ka sngi kaba ka jylla ka ïoh ïa ka jylla kaba pura. Ka jingkhublei ka long ruh halor ka jingshim khia ka sorkar pdeng ban pynpoi ïa ka jingbatai bniah ha kaba ïadei bad ki jingkieng jri ka jylla ban pynïoh ïa ka jingithuh hakhmat ka pyrthei.
Ha kane ka jingïakren, u Myntri Rangbah ka jylla u la pynsngew haba ïadei bad ki kam pynroi, ka jingkiew ha ka ïoh ka kot, bad ka jinglah ban nang kham pynbha shuh shuh ha kaba ïadei bad ka bor jabieng kaba dei kawei na ki dak ki shin kaba kren ha kaba ïadei bad ka roi ka par. Ka jingkyrshan ïa ki jaka shna pynmih bam kaba long kum ka jingkyntiew ïa ka ïoh ka kot jong ki nongrep.
Ha kaba ïadei pat bad ka jingkyntiew ïa ka jing pynbha ïa ka New Shillong City, la pynsngew ruh ha u Myntri Rangbahduh ka ri India ïa ka jingwan shakhmat ki riew paidbah ban kyntiew ïa ki kam jngohkai pyrthei, ka jingmih shakhmat ki paidbah nongshong shnong ban ïa shim bynta ha kane ka kam kaba long ruh shibynta ka jing pynkhreh ïa ka National Game kaba 39th ka ban long ha u snem 2027 bad ka phang pdeng ka long ban pynneh ïa ki riti ki dustur jong ki riewlum.
Ha kane ka jingïakynduh kila ïakren kumno ban kyntiew ïa ka jylla ha ka ïoh ka kot khamtam ïa ki jylla ha kane ka thaiñ shatei lammihngi kiba donkam ïa ka jingïarap na ka sorkar pdeng ban pyntrei ïa kino kino ki jingtrei bad la ïakren ruh ba kumno ban pynkiew shuh ïa ki lad jingïarap kiba wan nabar ri bad kane kan ïarap wat ïa ka jylla Meghalaya ruh ban pynkhlaiñ ïa ka ïoh ka kot ha ka jylla hi baroh kawei.