Shillong, Nailar 18: U President ka Congress bad MP barim ka Shillong Constituency u Bah Vincent H Pala, ha ka sngi Nyngkong ula ïakynduh ïa u Myntri Rangbah ka Jylla u Conrad K Sangma bad kyrpad ban kyntiew kyrdan kyrkieh noh ïa ki surok DSSH sha ki National Highway.
Ki surok DSSH ki shakri kum u budlum ba donkam bha ha ka ïoh ka kot, kaba kit kumba 80% u dewïong na Ri-lum Jaiñtia bad ba pynïasoh ïa ki jaka ba riewspah bha ha ka jingdon ki marpoh khyndew kum ka Sutnga, Sumer, Saipung bad Nongkhlieh.
La ong ba watla ka bynta ka long ban pynsuk ïa ka khaïi ka pateng bad pynmih khajna ïa ka JHADC bad ka Jylla, kane ka surok ka la shu shah ieh khongreng la slem bha bad dangsah ha ka jinglong ba jot rathai bha.
Ha ka shithi sha u Myntri Rangbah, u Bah Pala u la pynkynmaw ba katba ka Ministry of Road Transport & Highway (MoRTH) kham mynshuwa ka la dep ai jingmynjur ïa ka jingtyrwa ban kyntiew kyrdan, hynrei ka jingpyntreikam ka dei kaba dang ban sdang.
U la pynpaw ruh ïa ka jingdonkam ba ka Sorkar Jylla ban kynthup noh ïa kane ka surok hapoh ka skhim World Bank hynrei ula ban jur ïa ka jingdonkam ban leh eiei noh mardor haba khmih ïa ka jingsniew bad jingjot rathai jong ka surok bad ka jingmad jingeh ki nongshong shnong ka thaiñ ha ka leit ka wan ba manla ka sngi.
Halor kane u Myntri Rangbah ula kular ïa u Bah Pala ba ka Sorkar jylla kan sa shim ïa ki sienjam kiba donkam ban leh eiei kham kloi noh ïa kane ka kam.
Hadien ka jingïalang, u Bah Pala ula ong, “Kane ka surok kam dei tang halor ka jingpynïasoh, ka dei ruh halor kaba ai kamai jakpoh, ka khaïi ka pateng bad ka bha ka miat jong ki hajar hajar ngut ki briew. Ka jingpynslem ha ka ban kyntiew kyrdan ka la ktah jur bha. Nga pdiang sngewbha ïa ka jingkular u Myntri Rangbah bad ngan dang ïai bteng ban buddien ïa kane ka kam tad haduh ba ki paidbah kin ïoh ïa ka jingtei kaba ki dei hok ban ïoh kumba la ong.”
