Kynduh Principal ka HYC ba kynnoh ai kam ka Ri Bhoi College sha ka Kompani ba nabar ka jylla

Nongpoh, Jylliew 24 : Ki nongïalam ka HYC Nongpoh Circle mynta ka sngi ki la leit syndon ban kynduh ïau Principal ka Ri Bhoi College ban wad jingtip halor ka jingkynnoh ba katei ka College ka ai kam sha ka Kompani ba na shabar ba la tip kum ka Consilipsum Tech India Private Limited na Assam.
Haba leit ban kynduh ïa u Principal ka Ri Bhoi College, u E.C Benny, la ïalam da u samla Tony Shylla kum u President ka Nongpoh Circle ha ryngkat ka jingdon lang ki dkhot bad ruh u Samla Sunshine Makri, President ka HYC Bhoirymbong Circle.
Haba kren sha ki lad pathai khubor hadien ka jingkynduh ïa u Principal ka Ri Bhoi College, u President ka HYC Nongpoh Circle, u Samla Tony Shylla, u la ong ba ka daw kaba la pynlong ïa ka seng ban leit wad jintip na u Principal, ka dei halor ka Nongrim ba ka seng ka ioh jingtip ba kane ka College ka ai kam pynban sha ki Kompani ba na shabar khlem da pyrkhat ïa ki Kompani kiba na ka jylla.
U la ong ruh ba ka seng ka la leit wad jingtip ruh la kane ka Kompani kaba wan na shabar ka la don neem ka trading License bad kum ka seng ka pyrshah jur ban wan ki Kompani ba na shabar namar ïa ki kam ba dang lah ban leh da ki Kompani ba na ka jylla dei ban ai shuwa ïa ki kam ha ki Kompani kaba dei na ka jylla ne ïa ki briew jongngi kiba lah ban trei ïa kitei ki kam.
Shuh shuh, u la ïathuh ruh ba katkum ka jingpynpaw u Principal ka Ri Bhoi College u la ong ba ka College kam poi pyrkhat ba don ki Kompani ba na ka jylla ba lah ban trei ïa ka kam bad dei namar kane ka daw ba ki ai ïa katei ka Kompani.
U la pynpaw ruh ba u Principal u la ïathuh ruh ba ka long kaba eh ban pynsangeh ïa ka kam jong katei ka Kompani khlem da don ka daw kaba biang bad wat la katta ruh ki bor pynïaid ka College kin sa ïa shong pyrkhat khnang ba ka kam kan ïaid beit ïaid ryntih.