Shillong, Jymmang 27: Ka Khasi Students’ Union, lyngba ka Education Cell, ha ka sngi Thohdieng ka ïakynduh ïa u Secretary jong ka tnat Education ka Sorkar Jylla u Ambrose Ch Marak bad aiti ïa ka dorkhas jingdawa halor ki mat kiba kyrkieh ba ki samla pule ki ïakynduh.
“Kawei na kine ki mat ka long nalor ka jingpyrkhing ïa ka rukom ai Application Form ha PGT College, Shillong ha kaba bun spah ngut kiba kwah ban pule ha kane ka jaka pule ki lah duh lad noh ban leit namar ba kim ïoh satia ïa ka Application Form,” ong u Education Secretary ka Khasi Students’Union u samla Pynkmenlang Sanmiet ha u kyrwoh ba la phah sha ki lad pathai khubor.
“La sakhi ruh ba ka jingieng ban ap laiñ na ka bynta ban ïoh ïa ki Application Forms ka sdang naduh ka por 12:00 baje shiteng synñia haduh mynstep ynda la plie ophis. Bun na kiba ap ruh kim ïoh satia ïa ki Form. Kane ka la pynlong ïa ka seng ban dawa da kaba pynkiew biang ïa ka nombar jong ki Application Form na ka 500 tylli la kumno kumno 1000 tylli bad ruh ban pynjlan biang ïa ka tarik thep Form,” ong u kyrwoh.
Ka seng ka la pyntip ba u Ambrose Ch Marak u la kular ban shimkhia da kaba u la telephone mar mar sha ka Principal jong ka PGT College ha kaba u la bthah ba dei ban pynkiew biang ïa ki nombar jong ki Application Form bad ka seng hi ka ngeit skhem ba ka College ruh kan leh ïa kaba bha tam.
“Ha ka jingïakynduh bad ka Principal jong ka College, na ka liang jong ka seng ka la ai jingmut ban shu leh noh da ka Online Mode ha kaba ïadei bad ka Admission Procedure bad na ka liang ka College ka la shim ba kane ka jingai jingmut ka long kaba dei bad ngeit skhem ba ha ki snem ban sa wan, ngin sa sakhi ïa kane,” la bynrap u kyrwoh.
Ha kaba ïadei bad ki Centre na ka bynta jong kito kiba hap ban thoh ïa ka CUET, ka seng ka la dawa ban pynthikna ba ki samla Khasi ki dei ban ngat beit ha Shillong.
Kum ban shu pynkynmaw, halor kane kajuh ka mat, ka seng ka ladep ban dawa naduh u snem ba ladep ban pynthikna ba ki Centres jong kito ki samla Khasi kiba thoh ïa ka CUET kin hap ban dei beit hapoh Jylla lajong bad kumta hi ka Sorkar ka la leh ïa kaba donkam.
“Kaba sngewlyngngoh pat ka long, ba mynta u snem ruh dang bun bha ki samla Khasi kiba hap thoh ïa kane ka eksamin ki hap ban leit sha bar Jylla, te kumta hapdeng ka jingïakynduh bad u Secretary jong ka tnat Education u la kubur ba ïa kito kiba dang hap leh ïa kane ka eksamin ha kine ki taiew ban wan kin sa hap ban thoh noh ha Shillong,” la pyntip u kyrwoh na ka KSU.
“Ka mat ba ka seng ka la dawa ka long halor ka jingïatyngkhuh ki tarik thoh eksamin jong ka D.El.Ed bad ka B.Ed ki ban sa long ha ka 10 tarik, Jylliew, 2023 bad na ka liang jong u Ambrose Ch Marak, u la kubur ba yn sa pynkynriah noh bad ïa kane ha kaba yn sa pynbna paitbah ha ki sngi ban sa wan,” la pyntip ka seng.
