Jowai, Nohprah 06: Ka Jaiñtia Coordination Committee for Reservation Policy (JCCRP), kaba kynthup ïa ka Jaiñtia Students Union (JSU), Jaiñtia National Council (JNC), Jaiñtia Youth Federation (JYF), Jaiñtia Students Movement (JSM) bad ka Synjuk ki Waheh Shnong Ri Jaiñtia, ki la ïoh ban ïakynduh ïa ki dkhot jong ka Expert Committee jong ka State Reservation Policy (SRP) mynta ka sngi Thohdieng jong ka 06.12.2024.
Ïa ka jingïalang la pynlong ha ophis treikam jong ka Soil and Water Conservation ha Jowai, ha kaba ka komiti ka la aiti ïa ki jingai jingmut bad ki mat na ka bynta ka SRP.
Ka JCCRP, ha ka memorandum jong ka, ka la tyrwa ba 80% ki bhah kam hapoh ka SRP dei ban plie ïa ka jingïaleh hapdeng ki lai tylli ki riewlum (Tribe) ka jylla Meghalaya kata ki Khasi, Jaiñtia bad Garo.
U Chairman ka JCCRP u Jershom Shylla ula ong ba kane ka jingpynbeit kan pynmyntoi ïa ka jinglong kaba kynthup lang da kaïakhun. Katkum ka jingong u samla Shylla, kum kane ka jingkylla ha ka polisi kan pynshlur ban jied ïa ki briew kiba la biang tam katkum ka jingtbit jong ki, kaba lah ban wanrah ïa ka jingtreikam kaba kham bha.
Ka JCCRP ka ngeit da ka jinglah ban wan rah ïa kane ka jingkylla haka Policy, kan wan rah shi bun ki jingmyntoi ïa baroh hapoh ka jylla. Ka komiti ka la pynskhem shuh shuh ba lyngba kane ka jingtyrwa kan wan rah ïa ka jingmytoi lang baroh bad ka jinglong kaba ïaryngkat hapdeng ki jaitbynriew trai ri trai muluk Khasi, Jaiñtia bad Garo.
Nalor ki jingpynkylla ïa ka SRP, ka JCCRP ka la khot ruh ïa ka sorkar ba kan bishar bniah bad pynkylla ïa ka Scheduled Tribes Order jong u snem 1950 namar ba ka ïadei bad ka jylla Meghalaya. Ka komiti ka la pynpaw ïa ka jingsngewkhia halor ka jingpynrung ïa ki jaitbynriew kum ki Kuki bad ki 37 tylli ki jaitbynriew rit jong ki, da kaba kynthoh ba kine ki jaitbynriew kim shong shuh ha ka jylla. Ka JCCRP ka la tyrwa ban weng noh ïa kine ki jaitbynriew na ka thup Scheduled Tribe jong ka jylla Meghalaya.
Shuh shuh, ka JCCRP ka la ai jingmut ba ka sorkar jylla ka dei ban bishar bniah na ka por sha ka por ïa ka State Reservation Policy ban pynthikna ba ym don ki jaitbynriew kiba shah pynduh ïa ki jingmyntoi jong ka katba nang mih ki sngi.
Ka komiti ka la kyntu ruh ïa ki nongmihkhmat kum MLA kumjuh ruh ïa ki dkhot jong baroh ar ki jaidbynriew Khasi bad Garo, kiba don kajuh ka jingsngewkhia, ba kin kyrshan ïa kine ki jingpynkylla na ka bynta ka jingbha jong ka jylla.
