Kynduh jingeh ki paidbah ba thut ka jingsam bor ding ka tnat MeECL ha sorbah Khliehriat

Khliehriat Jylliew 26: Ka long kaei kaei kaba sngewlyngngoh ba ka sorbah Khliehriat, kaba dei ruh ka Head Quarter jong ka East Jaiñtia Hills District ka mad ïa ka jingduh bor ding kaba khah khah bad ki don bun tylli ruh ki dong ha shnong Khliehriat kiba la duh bor ding mynta lah bun taiew ki la shu shong khlem bor ding, kane ka jingduh bor ding bad jingthut ka bor ding ka buh jingeh ïa ki paidbah ha kiba bun ki liang.
Kumba baroh hi ki tip ba ha Khliehriat, ki don bun tylli ki skul, ki ophis, ki dukan bad kine baroh ki donkam bha ïa ka bor ding, hynrei ka jing thut khah khah ka bor ding electric ka ju wanrah ruh ka jingthut bad jingdkhoh ha ka rukom treikam ha ki skul, ki ophis bad ha ki dukan khamtam kito ki dukan kiba don ha ki jaka ïew ka jingduh bor ding ka la wanrah ruh ïa ka jingduhnong ïa ki nongshong dukan bad ki khynnah pule kiba pyndonkam da ka bor ding electric.
Ha kajuh ka por, katno ka long kaba sngew jah burom ïa ka tnat MeECL East Jaiñtia Hills District, ba kat ka District Headquarter ruh ka dang kynduh jingeh khah khah ha ka jingioh bor ding electric, ha ka jingshisha ka tnat MeECL ka la dei ban shim khia bha ban pynbit pynbiang ïa ka bor ding ha ka shnong Khliehriat baroh kawei namar baroh (maximum) ki paidbah ki shaniah ha ka bor ding electric ha kiba bun ki kam ki jam jong ki.
Ki ong ruh ba lada ka jingduh bor ding ka jia khah khah kan long ka jingduh nong kaba khraw ym tang ïa ki paidbah, hynrei ïa ki khynnah pule ruh kiba pule ha ki skuk, ha ki college bad ha ki shnat (Centre) pule bapher bapher bad ki nongshong dukan kiba don ha sorbah Khliehriat.