Kynduh jingeh ki nongleit nongwan ba julor palat ka surok NH-6 ha ki thaiñ Narpuh

Khliehriat Jylliew 14: Ka jingjulor khamtam ka jingpei thliew ka surok national highaway ha shi lynter ka surok ha ki thaiñ Narpuh East Jaiñtia Hills District, ka buh jingeh haduh katta katta ia kiba ñiah kali bad kumjuh ruh ki paidbah nongleit nongwan, namar ka jingpei thliew ka surok ha kiba bun ki bynta jong ka surok kaba la i kum ki pung hapdeng surok.
Ym tang ka jingpei thliew, hynrei ki don ki bynta jong ka surok kiba la shah tap da ka um kaba lang, don ruh ki bynta kiba dap da ka jyrsieh, kane ka jinglong jingman ka surok ka buh jingeh haduh katta katta bad ka ju wanrah ruh ïa ka jingdheng kali kaba khah khah. Ki thymmei khubor, ki iathuh ruh ba ka don ka jingtwa khyndew ha ki katto katne tylli ki jaka, ha Pyrtakuna, ha Kuliang ha kaba ki nongtrei jong ka Natinal Highway Authority of India ki dang iakhun ban pynkhuid ïaka surok bad ong ruh ba haduh mynta ki kali ki dang lah ban iaid tang shiliang ka surok, kane ka jingïaid ki kali kaba tang shiliang ka surok ka wanrah ïa ka jingdheng kali ha kiba bun ki jaka ha ka surok ha ki thaiñ Narpuh.
Watla na ka liang u Deputy Commissioner u Abhilash Banarwal, IAS u la shim khia ha kaba iadei bad ka jingsniew palat ka surok ha East Jaiñtia Hills District bad bthah ïa ka NHAI ba kan pynpoi ïa ki kai phot bad pynshai ba na kaei ka daw kaba la pynlong ïa ka surok ba kan julor khah khah bad kumjuh ruh kiba bun ki seng-bhalang na East Jaiñtia Hills District, na ka por sha ka por ki la dawa na ka NHAI ba kan maramot ïa ka surok kaba la julor bad buh jingeh ïa ki paidbah hynrei kane ka jingdawa kam pat shym la urlong haduh mynta, ha kaba ka jingpei thliew ka surok, ka jingdap um ka surok ka dang jia ha katei ka thaiñ bad bunsien ka ju wanrah ïa ka jingdheng kali bad jingthut ha ka leit ka wan.