Shillong, Naitung, 25: U MLA jong ka Sutnga Saipung u Bah Shitlang Pale u la pynpaw ka jingsngewkyndit bad sngew phylla ban ïohi ïa ka jingmih khubor lamler ha ki Social Media kaba ong, “Pur ka khubor ba yn rung BJP u ma Shitlang Pale.”
U Bah Shitlang Pale, ha u kyrwoh ba la phah sha ki lad pathai khubor ha ka sngi Saitjaiñ, u la ong, haduh mynta um pat don kano kano ka jingmut nalade ban leit rung sha ka Party BJP bad ban ïakhun ïa ka elekshon 2023 na kane ka Party.
“Ngam tip ruh nangno kine ki nongpynmih khubor ha ki Social Media (Facebook) ki ïoh ban thoh ïa kum kitei ki jait khubor kiba long pyrshah ïa ka jingsngew jong u briew shimet,” ong u Bah Pale.
Haba pynshai halor kane ka khubor lamler une u MLA jong ka Sutnga Saipung Constituency u la ong, “na ka liang jong nga, ngam don bynta ne don jingïadei ei ei bad ka Party BJP, hynrei kane ka jingpynmih khubor ka long tang ban pynthoh bria ïa nga, kaba dei ruh ka buit sianti jongno re jongno kiba kwah ban pynkulmar jingmut ïa ki nongkyrshan jong nga ha kane ka elekshon 2023 ban sa wan.”
U Bah Shitlang Pale u la kyntu ïa baroh ki nongkyrshan jong u na ka Sutnga-Saipung ba kim dei ban sngap ïa kum kine ki khubor ka khlieng ka tyngab, kiba kwah ban pynsniew dur ïa ka jinglong Nongmihkhmat jong u, hynrei lada kino kino kiba kwah ban tip ïa ka jingshisha ki lah ban kylli beit beit na u hi.
