Kyndit thret ka Hima Langrin ba shah weng kam Acting Syiem u Bah Bryllyenhenry ha ka KHADC
Mawkyrwat, Ïaïong 09: Ka Hima Langrin mynta ka sngi ka 9 tarik u Ïaïong, 2026 ka la pynpaw ïa ka jingsngew lyngngoh bad sngewkyndit halor ka jingweng noh u Bah Bryllyenhenry Syiemiong, uba bat kum u Acting Syiem jong ka Hima Langrin, ha ka EC jong ka Khasi Hills Autonomous District Council (KHADC) khlem kano kano ka jingpyntip lypa ne ka jingbatai halor ka daw jong katei ka rai.
Kumta ban ïa kren sani halor kane ka mat ka kongsan u Acting Syiem uba la shah weng ryngkat ka Hima ki la pynlong ïa ka jingïalang ba lyngkot ha kaba la ïadonlang ki Myntri jong ka Hima Langrin ryngkat ki Lyngdoh.
Haba kren sha ki lad pathai khubor, u Bah Bryllyenhenry Syiemiong u la ong ba ha kane ka por ka Hima ka dang don hapdeng ka jingpynkhreh ban ai wai ïa ka ïew bad ki mar jong ka Hima sha ki paidbah, katkum ka jingai bor na ka KHADC, da kaba pynlong ïa ka jingthep tender ha ka 9 tarik u Ïaïong, 2026. Pynban, ha ka por 7 baje mynstep jong kane ka juh ka sngi, la ïoh pdiang ïa ka shithi na ka KHADC kaba pynbna ïa ka jingsangeh noh ïa ka jingtreikam jong u kum u Acting Syiem bad ka jingweng noh syndon ïa u na katei ka kam. Ha kajuh ka por, la thung pat da uwei pat u Acting Syiem, kata ïa u Bah Pynshngainlang Syiemiong.
Namarkata, na ka liang ka Hima Langrin bad u Acting Syiem barim, ki la pynrem jur ïa kane ka jingleh donbor jong ka EC jong ka Khasi Hills Autonomous District Council (KHADC), kaba la lamkhmat da ka Voice of the People’s Party (VPP), bad ha ka juh ka por ka la buh ruh ka jingkylli bad pan jingshai ba balei ba la shim ïa kum kane ka rai khlem jingpyntip bad khlem kano kano ka daw kaba shai. Ym tangkata, u la ong ruh ba i mat ba kane ka jingleh donbor jong ka KHADC ka pyni ba ka Hima Langrin ka la long thik ne ka la dei ka nongkynti jong ka KHADC.
Kumta, u Acting Syiem barim u la kyntu bad maham ïa kiwei pat ki Hima ba kin long kiba husiar ïa kane ka Executive Committee (EC) kaba thymmai hapoh ka jingïalam jong ka VPP namar ka jingïohi ba ka lah ban bteng ban leh donbor sa ha ki kam Hima Sima jong kiwei pat.