Kyndit ki nonghikai ba pynmih hukum ka sorkar na ka bynta ki final eksam klas VI-IX

Nongstoiñ, Naiwieng 06: Ki nonghikai jong ki skul bapher bapher ha West Khasi Hills khamtam ki nonghikai jong ki skul ba la seng da ki kynhun balang Khristan, ki la kyndit thret kumba ïuh tdong bseiñ halor ka jingpynmih jong ka sorkar ïa ka Notification ha ka 4 tarik mynta u bnai, lyngba ka ophis jong ka Education Department ha ka 4 tarik mynta u bnai kaba la soi da u Vijay Kumar Mantri Commissioner & Secretary ka sorkar Jylla.
Ha katei ka notification la kdew ba ki jingkylli ha ka Final Exam jong ki Class VI haduh Class IX na ka bynta ki skul ba la seng da ki Kynhun balang, kim dei shuh ban long ki juh naduh une u snem 2025 sha khmat.
Hadien ba la ïoh jingtip ïa katei ka notification ba la pynmih da ka sorkar, kiba bun ki nonghikai hapoh ka district khamtam eh na ki nonghikai jong kito ki skul kiba la seng da ki kynhun balang Khristan, ki la pynpaw ïa ka jing sngewkyndit bad ka jingsngew bitar halor katei ka jingpynmih hukum jong ka sorkar.
Halor katei ka notification don ki nonghikai kiba la ong ba kane ka dei ka jingleh biej jong ka sorkar, namar ba ki skul ba la seng da ki kynhun balang Khristan ki lah don bad balei ba ka sorkar kan dang pynkylla khongpong tang mynta, haba baroh shi katta ka sorkar kam ju ithuh niam ha ki Exam jong ki skul.
Don pat kiba ong ba hato kham don bor ka Education Department ne kham don bor ki kynhun balang ban seng bad pynïaid ïa ki skul. Nalor kata don kiba ong ba ka tynrai ba nyngkong eh jong ki skul ha Meghalaya ka dei naduh ka por ba ki Missionary na ri sepngi, kiba la wan ban seng ha Sohra mynba ïa ka ylla Meghalaya ym pat don ba phohsniew ba kan don bad wat hadien ba ka ri India ka la ïoh ïa ka jinglaitluid ruh.
Baroh ki skul ha ri Khasi bad Jaiñtia ki dang dei ki skul ba la seng da ki kynhun balang Khristan, hynrei mynta pat kane ka sorkar ka la shu pynshad shrieh katba ka sngewbit bad la dei hangne ba ka ktien tymmen kaba ong ba la synshar ka biej ka la urlong.