Shillong, Ïaiong 12 : Ka National Hynniewtrep Peoples ha ka sngi Nyngkong ka la pynpaw ba ki dap da ka jingkyndit kaba khraw bad sah lyngoh hadien ba la mih ki khubor ba la khylliap lama ïa ka seng jong ki.
Haba kren bad ki lad pathai khubor, u President ka Seng, Bah David Mawlong u la ïathuh ba ki nongïalam jong ka seng kiba don kylleng ki distrik ki la kyndit lut haba ki ïoh jingtip halor kane.
Da kaba maham ïa kito kiba donkti ha katei ka kam ba kim dei ban tuklar ïa ki kam jong ka Seng, u Bah David u la ong, “Lada ki kwah ban thaw seng ki dei ban thaw da kaba thymmai ym ban pyndonkam bakla ïa ka seng jongngi.”
Katkum ka jingong jong u, katei ka jingpyrshang ban pynduh pyndam ïa ka seng da ki katto katne ka la pynkulmar ïa kiba bun khamtam ïa ki paidbah jong ka jylla kiba shaniah ïa ka jingtreikam jong ka Seng.
Haba bynrap lang, u General Secretary Bah Lam Dympep u la ong ba ki kwah ban pynshai bad pyntip sha ki paidbah ba ka NHP kam pat khylliap lama. “Nga kyntu ïa ki ba kim dei shuh ban tuklar ïa ka jingtreikam jong ka NHP bad ruh ba kim dei wat ban pyndonkam bakla ïa ka kyrteng jong ka seng.
U Organising Secretary ka seng Bah K Nongbri pat u la ong ba ka jingdon ki katto ban pynbna khylliap lama ïa ka seng ka pynsuba ba ka don kaei re kaei ha lyndet. “Ngi la dep ong ïa ki paidbah ba lada don kiba wan kam ha kyrteng ka seng ba kin pyntip shangi,” u la bynrap shuh shuh.
