Shillong, Jylliew 15 : Ka Meghalaya State Commission for Women (MSCW) kala pynpaw ïa ka jingkyndit ba ka Sorkar ka la shu wengkam syndet ïa ka Kong Phidalia Toi na ka shuki Chairperson ka Commission khlem da ïaid kat kum ki kyndon Aiñ.
Ka kyrwoh ba la pyllait da ka MSCW hynne ka sngi Balang ka ong “Ka MSCW ka la pynlong ïa ka jingïalang ba kyrkieh ha ka 13 tarik Jylliew ha Ophis, ha kaba baroh ki Dkhot kiba ïadonlang, kila pynpaw ïa ka jingkyndit ban ïohi ïa ka khubor bala weng kam ïa ka Chairperson ka Commission da u Myntri ka tnad Social Welfare Bah Paul Lyngdoh”.
“Kane ka jingweng bala pynbna lyngba ki lad pathai khubor ka dei kaba la leh palat ïa u pud bad kaba leh pyrshah ïa ki kyndon ka aiñ, ka Meghalaya State Commission for Women Act, 2005” kala bynrap.
Ka kyrwoh kala ong ruh ba u Myntri ula ïoh ïa ki jingtip kiba bakla ba ong “Ka Chairperson ka la jah haduh 3 na ki 4 tylli ki jingïalang jong ka Commission”.
“Kat kum ka jingshisha hi, baroh ki jingïalang ka Board jong ka MSCW la pynïaid da ka Chairperson” kala ong haba bynrap ba ki minutes (jingïakren) jong ka jingïalang bad baroh ki jingbuh jingthoh ïa kaba la buh ha ka Ophis jong ka Commission Chapter II section 4 (3) jong ka Meghalaya State Commission for Women Act, 2005 ka ong “…Ym lah ban shu weng kam ïano ïano ruh hapoh kane ka sub-section tad haduh ba ïa u/ka la dep ban ailad ban sngap ïa kaei kaba ki don ban batai halor kane ka kam”.
Ka kyrwoh ka ong ruh ba ka Chairperson ka la shem ba ka la shah weng na ka shuki lyngba ki lad pathai khubor kiba mih ha ki social media bad bynrap “Kam shym la don ka jingai notice halor ki jingkynnoh pyrshah ïa ka lane ka jingailad ba kan pynksan ïalade kat kum ki kyndon ka aiñ”.
