Jowai, Naitung 05 : U Chief Executive Member ka Jaiñtia Hills Autonomous District Council u ma Thombor Shiwat mynta ka sngi ha ka jingkren sha ki lad pathai khubor, ula pynpaw ka jingsngew kyndit halor ka jingshah kyntur pud ki jaka puta jong ka Council khlem da ïoh jingbit.
Kane ka jingshah kyntur pud da kaba khlong ïa u mawleiñ, ka jingpom tuh ïaki dieng jong ka tnad forest ka Council kala jia ha ki ar tylli ki jaka kata ha Saitsama Plantation bad ha Thadmynri Plantation.
Hadien bala ïoh jingtip ïa kane ka Executive Committee ha ryngkat ki ophisar kila leit hiar hynnin ka sngi sha kitei ki jaka ba tih Mawleiñ bad ka jaka pom tuh ïa ki dieng ban lap ïa ka jingshisha.
U ma Thombor ula ong ïa kane ka jaka ba tih mawleiñ la dep ban die da ka shnong Saitsama sha kawei ka Contractor na Assam da kaba pyndonkam da ka Mining Lease jong ka Assam, hynrei haba peit ïa ka map kane ka jaka ka dang hap hapoh u pud u sam ka Council. Shuh shuh ula ong kane ka rukom tih mawleiñ kala long kaba jur bha da kaba pyndonkam da ki machine puh shilum, katba ha Tnadmynri kumba tih thliew khnai ha kiba bun ki jaka.
U CEM haba kylli na u Secretary Shnong ka Saitsama balei la die ïa katei ka jaka jong ka Council khlem ïoh ïa ka NOC, ula jubab la leh khnang ïa kane namar ka sorkar jylla (Meghalaya) ka khlem leh eiei ïa ki jaka ha khappud.
Halor kane ka jingïaid laid jong ka shnong ka Council kala rai ban khot hajir ïa ki haka 10 tarik mynta u bnai ban pyntikna ïa ka jaka ha ryngkat ki kot ki sla.
Ka EC kala leit hiar sa ha Tnadmynri Plantation bad la lap u mawleiñ bala lumthup bad ka jingpom tuh ïa ki diengkseh, ki diengsal kala long kaba jur bha ha katei ka jaka ka Council.
Halor kane u CEM ula kren shai ba ka Council kam ai lad satia ïa kum kine ban kan pynshitom tyngeh ïa kino kino kiba donkti ha kane ka kam.
Ula pyntip ïa u Mawleiñ bala dep tih la dep ban bat (seize) bad kumjuh ïa ki diengsal bala ïoh kem la leit buh ha Mookyndur.
