Nongpoh, Ïaiong 06 : Ki runar bym lah ban ithuh ki la pynjulor bad kyndang ïa ka ATM mashin jong ka Meghalaya Co-Operative Apex Bank Ltd., Bhoirymbong Branch bad ïoh ban rong tuh ïa ka pisa kaba kot haduh T.7,77,500/-.
Katkum ka jingïoh lum jingtip, la ong ba kane ka jingjia ka la jia ha ka miet jong ka 05 tarik Ïaiong haduh ka step jong ka 06 tarik Ïaiong. Kitei ki runar ki la leit ban leh ïa kane ka kam ha ka ATM jong katei ka bank kaba don ha shnong Lumdaitkhla, Bhoirymbong.
La lap ïa kane ka jingjia da u nongap pahara jong ka bank ha ka por kumba 8 baje mynstep jong ka 06 tarik Ïaiong, ha ka por ba u leit ban plie ïa ka ATM.
Na ka liang u Branch Manager jong katei ka bank u la dep ban ujor da ka ejahar ha Khapmara PIC ban pynlong ïa ka jingtohkit bad ban thwet ïa ki runar kiba donkti ha kane ka kam. Ki pulit ruh ki la register case ha Umiam PS Case No. 20(4)2026 hapoh ki kyndon ain 305(a)/331(4)/324(5)/61(2)(b)/3(5) BNS.
