Kyndang ki Pulit Meghalaya ïa ka ktem pynrung tuh ïa ki mynder Bangladeshi sha India ha Mumbai

Nongpoh, Ïaïong, 20: Ha ka jingtohkit bad ka jingbudien hapoh ka jingïalam jong u Probationer IPS u Ashu Pan, ki Pulit ka jylla Meghalaya ki la lah ban pynpulom bad ïoh kem ïa ki briew kiba ju donkti ban pynrung ïa ki mynder Bangladeshi sha India da kaba shna thok ïa ki kot ki sla ban pynshisha ba ki nongrung be-aiñ ki dei ki nong India.
Kane ka jingtohkit ki Pulit ka Meghalaya halor kine ki kam shukor ban pynrung tuh ïa ki mynder Bangladeshi sha India lyngba ka khappud ka la sdang naduh ka 14 tarik, Rymphang 2025 ha kaba ki Pulit ki la lap ksai na ka kynhun ba la ïohkem bad ba la suba ba ki dei ki mynder Bangladeshi kiba wan ïaid lynti na Guwahati sha Shillong.
Na ka jingïoh bat ïa katei ka kynhun, ki Pulit ki la pynap shrip ha Nongpoh ha kaba la ïoh kem sa san ngut ki mynder Bangladeshi ba kynthup saw ngut kiba la heh ka rta bad iwei i khynnah.
Naduh u bnai Kyllalyngkot mynta u snem tad haduh mynta, ki Pulit ka Ri Bhoi ki la ïoh kem haduh 24 ngut ki mynder Bangladeshis ba kynthup 12 ki kynthei bad lai ngut ki khynnah rit ba dang hapoh 18 snem ka rta.
Kine ki suba mynder Bangladeshi ha ka jingtohkit ki pyni da ka Aadhar bad PAN Card bad ha ka jingtohkit bniah ka pyni ba ki dei ki mynder Bangladeshi kiba shu rung tuh sha India la ar bnai mynshuwa da ka jingïarap ka kynhun ba pynrung tuh ïa ki sha India. Ki san ngut ki mynder Bangladeshi ki la phla ha ki Pulit ba ki la leit sha Mumbai ban kam wad jam bad ki la thmu ban leit phai biang sha Bangladesh da kaba ïaid lynti lyngba ka khappud na ka jylla Meghalaya.
Ha u kyrwoh ba la phah sha ki lad pathai khubor, ka tnat Pulit ka la ong, ki suba mynder Bangladeshi ki la phla ba ki shna thok ïa ka Aadhar Card bad ka PAN Card da ka jingïarap jong u Sheikh Mohd Mujib uba sah ha Mumbai. Une u Sheikh Mohd Mujib u dei uwei na u nongïarap ban pynrung tuh ïa ki mynder na ka ri Bangladesh sha India da kaba shna thok ïa ki kot ki sla, ban thok ruh ïa ki jaka shong jaka sah bad sa phah pat ïa ki briew jong u ban pynrung tuh na ki khappud ban poi sha ki jaka sor bad sa phah pat kum sha Mumbai, Ahmedabad bad sha kiwei kiwei ki jaka.
La ong ruh dei lyngba ka jingïai bteng jong ki Pulit ïa ka jingtohkit bad ka jingbuddien la lah ban pynpulom ïa kawei ka ktem ha Mumbai ba ka Nusrat A. Kazi bad u Jabir Yunus Shaikh ki la pyndonkam da ki dulir thok ban plie ïa ki Bank Account ha ka kyrteng jong ki mynder ri kiba wan rung tuh sha India na ka ri Bangladesh bad ïa kine ki Bank Account ki pyndokam thok pat ban shim ram bad ban leh ïa ki kam thok.
Da ka jingïoh kem ïa ki snar nong leh thok, la phah ïa ka kynhun Puli tba kyrpang na Meghalaya ba la ïalam da u Assistant Superintendent of Police (ASP) u Ashu Pant bad da ka jingaibuit jong u Senior Superintendent of Police ka Ri Bhoi u Vivekanand Singh Rathore ka kynhun tohkit ki Pulit ki la leit sha Mumbai bad da ka jingïatreilang bad ka ophis u Commissioner of Police, Navi Mumbai, u Milind Bharambe bad da ka jingïarap ki Pulit na Mumbai ki la khynra naphang kylleng ka thaiñ Navi Mumbai bad ha South Bombay.
Ka kyrwoh khubor ka ong, da kaba pyndonkam da ki kor ki bor ïa ka Nusrat A. Kazi bad ïa u Jabir Yunus Shaikh la ïohkem na Kopar Khairane bad Ulwe katba ïa u Sheikh Mohd Mujib la ïohkem na Rafi Ahmed Kidwai Marg, South Mumbai. Lyngba ka jingkhynra la ïoh ruh ban kurup ïa ki kot ki sla ba la shna thok ha kaba la pynthikna ruh lyngba ka jingtohkit lyngba ki kor ki bor ka juk stad mynta.
La ïathuh ruh ba ïa kitei ki ngut ki snar nongleh thok ban pynrung tuh ïa ki mynder na ka ri Bangladesh sha India la wan rah sha ka jylla Meghalaya ban pynlong shuh shuh ïa ka jingtohkit kaba bniah halor ka jingdonkti bad ka jingsuhbuit ban leh ïa ki kam shukor na ka bynta ban ïoh pynrung tuh ïa ki mynder na ka ri Bangladesh sha India.
Kine ki kam rung tuh bad ki kam thok ki mynder Bangladeshi, ka pynpaw ba ka jingïoh rung tuh ki mynder na ka Bangladesh da kaba ki pyndonkam ïa ki kot ki sla ba shu shna thok ka jur bha bad kane kan buh jingma ruh ïa ka jingshngaiñ jong ka jylla Meghalaya kynthup ruh ïa ki jylla ka thaiñ Shatei Lammihngi bad ïa ka ri India baroh kawei.
Ki nongsynshar ki sheptieng ruh ba da ki hajar ngut ki mynder ri ki lah ban leh thok ba ki dei ki nong India da kaba pyndonkam da ki kot ki sla ba shu shna thok bad ban pynpulom ïa kine ki kam leh thok la donkam ba ki bor ba dei peit ba kin long kiba peitngor bad ban pyntreikam ïa ki aiñ ha ka kylleng ki jylla.