Shillong, Rymphang, 11: Ka Organising Committee jong ka Khasi Students’ Union (KSU) Mawkhar Circle ha ka sngi Baar ka la pynher krad ïa ki katto katne ki nongbylla bar jylla kiba trei be-aiñ khlem kino kino ki kot ka sla kiba biang bad kiba trei ha Umsohsun.
Katba kine ki nongbylla bar jylla ki dang lum ïa ki tiar ki tiar ban leit phai noh, la poi kyndit ki Pulit ban khanglad ïa ki dkhot jong ka seng ha kane ka por bad ka la mih ruh ka jingïapyni nia hapdeng ki Pulit bad ki dkhot ka Seng.
Ki dkhot ka seng ki la pynphai nia ïa ki Pulit shaei ki jah ha kine ki taiew baladep haba kine kijuh ki nongbylla bar jylla ki la pynthud ïa ka leit ka wan bad ka ïaid ka ieng jong ki paradoh parasnam kiba sah bad kiba trei ha Umsohsun.
Ka KSU Mawkhar Circle ka la buh jingkylli ruh ba balei ki Pulit ki long pyrshah pynban ïa ka jingshong shngaiñ ka shnong ka thaw.
Ka Seng ka la pyntip ba ha kine ki khyndiat taiew ba la leit noh ki riewpaidbah ki la pyntip sha ka Seng ba kine kijuh hi ki nongbylla bar jylla kiba trei bad basah ha ka jaka bylla ynda la miet ki ïa dih ïabam bad ynda ki lah buaid ki pynthut ruh wat ïa ka ïaid ka ieng ki briew ba ïaid lynti. “Kaba lyngngoh mynta ka long shaei ki jah kita ki Pulit ba don ka jingkitkhlieh ha kata ka por?,” la buh jingkylli ka seng.
Shuh shuh ka seng ka la phah ruh ïa u kyrwoh uba shai sha kino kino kiba pyrshang ban khanglad ïa ka seng ban kyndang ïa ki bar jylla ka seng hi kan ym sngap ïano ïano ruh bad kan ïaid beit shakhmat khnang ban shngaiñ ka ri bad ka jaidbynriew.
