New Delhi, Jymmang 22 : U Myntri ka tnad Kam Pohïing ka sorkar pdeng, u Amit Shah, ha ka 21tarik mynta u bnai u la ong ba ka la long ka jingjop kaba khraw ha ka jingïakhun ban pynduhjait ïa ka Naxalism, namar ki bor pahara ki la ïoh ban pynliem haduh 27 ngut ki lehnoh Maoist, kynthup ïa u NambalaKeshavRao, ba ju tip ruh kum u Basavaraju, uba dei u general secretary jong ka CPI-Maoist, ha ka jingkhynra ha ka shnong Nambala, Chhattisgarh.
Halor kane, u Myntri u la ïaroh ïa ki bor pahara bad ki kynhun na ka bynta kane ka jingjop kaba khraw.
Ha ka post ha ka X, u Myntri u la ong, “Ka jingjop kaba khraw ha ka jingïakhun ban pynduhjait ïa ka Naxalism. Mynta ka sngi, ha ka jingkhynra ha Narayanpur, Chhattisgarh, ki bor pahara jong ngi ki la pynïap 27 ngut ki lehnoh Maoist, kynthup ïa u NambalaKeshavRao, uba la tip ruh kum u Basavaraju, u general secretary jong ka CPI-Maoist, u nongïalam ba hakhlieh duh, uba long ruh u budlum jong ka jingïakhih Naxal.”
Shuh shuh u ong ruh ba kane kadei ka sien kaba nyngkong ha ki lai phew snem jong ka jingïakhun jong ka Ri pyrshah ïa ki kam lehnoh ba uwei u nongïalam uba don ha ka kyrdan general secretary u la ngat ha kti jong ki shipai ka ri.
“Nga ïaroh ïa ki shipai pahara ba shlur jong ngi bad ki kynhun na ka bynta kane ka jingjop kaba khraw. Kumjuh ruh nga sngewkmen ban ïasam ba hadien ba la pyndep ïa ka Operation Black Forest, 54 ngut ki lehnoh Naxal ki la shah kem bad 84 ngut ki lehnoh Naxal ki la wan pyndem ha Chhattisgarh, Telangana, bad Maharashtra,” u la bynrap shuh shuh.
Nangta u ong ruh ba ka sorkarModi ka kut jingmut ban pynduh noh ïa ki kynhun lehnoh Naxal shwa ka 31 tarik u Lber 2026.
