Nongpoh, Risaw 08: U Dr Mukul Sangma u ba dei u nongïalam ka liang pyrshah ha ka jylla u la sangeh ha Nongpoh ha ka kylla step jong ka 8 tarik Risaw ha ka por kumba 12 baje tam shiteng synñia hadien ka jingiohi ïa ka jingtrei shitom jong ki pulit ka Ri-Bhoi kiba dang talasi naphang ïa ki kali pynkheiñ aiñ khamtam kiba dih buaid ha ka por ba ñiah kali hapoh ka jingïalam u Senior Superintendent of Police.
U Dr Mukul u la kyrpad ruh ïa u SSP ka Ri-Bhoi ban pynkhlaiñ ïa ka jingtalasi ïa ki kali na ka bynta ka jingshngaiñ ki paidbah ha kaba u la ong ruh ba un sa wan biang ban don ka program halor ka jingshngaiñ ha ki surok, da kaba pynkynmaw ruh ïa ka jingjia ha Thadrang ha kaba 4 ngut ki heprit ki la duh noh ïala jingim tang namar ka jingñiah khlem akor bad ka jingïap ki 2 ngut ki nongñiah kali sorkar na North Garo Hills namar ka jingbuaid u nongñiah.
Na ka liang u Dr Mukul Sangma u la ai jingïaroh ruh ïa ki pulit ka Ri-Bhoi kiba la trei shitom ban pynthikna ba ka leit ka wan jong ki paidbah kan long kaba shngaiñ bad lait na kino kino ki jingjia ba sngewsih.
