Nongstoiñ, Jylliew 06: Ka kynhun jong ka Seng Congress ha Mawthadraishan ka la pait arliang, ha kaba kane ka kynhun hapoh ka jingïalam, u Bah Manbha K. Raswai, General Secretary ka Seng, ka la rai ban mih noh na ka Congress bad ban leit ai jingkyrshan noh ïa u kyrtong jong ka HSPDP, u Bah Shakliar Warjri.
U Manbha, u la pyntip ba kane ka kynhun kan leit ïasoh sha ka HSPDP ha ka 11 tarik mynta u bnai ha ïing jong u Bah Shakliar ha ka 11 tarik mynta u bnai ha Kynshi Mawria.
Ha kajuh ka por u Bah Raswai, u wer ruh ïa kiwei ki nongkyrshan jong ka Congress kiba kwah ban leit lang ha katei ka sngi ba kin pyntip sha u ban leit lang ha katei ka sngi.
Lah ban kdew hangne ba ka Congress ha Mawthadraishan kadei ka Seng kaba nyngkong eh ban mih shakhmat na ka bynta ka elekshon MLA 2023, ha kaba u Bah Estansing Jana, u la ïaid kylleng kylleng ki Shnong ka Mawthadraishan Constituency ban leit pynkhlaiñ ïa ka Party. Nalorkane, la plie ruh ïa ka ophis ha Kynshi, ha kaba la wan plie da u Working President jong ka MPCC ha katei ka por u Bah James Lyngdoh.
Hynrei hadien ka jingpait noh jong ka Congress ha Meghalaya da ka jingleit pynïasoh u Dr. Mukul Sangma ryngkat ki 11 ngut ki MLA sha ka All India Trinamool Congress (AITC) hadien ka jingwan shimti u Bah Vincent H. Pala kum u President ka MPCC, u Bah Jana ruh u la shu jah noh suki suki bad ka Congress ruh ka la pait arliang noh, ha kaba ki don katto katne ki nongïalam kiba la poi noh sha ka HSPDP.
Kumba ka long mynta ha Mawthadraishan kiba la paw kyrteng ban ïakhun ki long u Bah H. Brolding Nongsiej na ka UDP, uba long u Sitting MLA. Nangta u Bah Shakliar Warjri na ka Seng HSPDP bad ka Kong Biolinda Lyngdoh Nonglait na ka Seng NPP.
