Kylla nongwad briew ka Congress ban ïakhun kum ki kyrtong ha ka elekshon 2023

Shillong, Lber 28: U MDC ka Congress na Rambrai-Jyrngam uba la iehnohkam na ka Congress, Bah Bajop Pyngrope ula ong ba ka Congress Party mynta kala pyrshang ban wad da ki MLA barim ne Nongïalam barim ban pynïakhun ïa ka elekshon MLA-2023 ha Jylla.
“Nga ïohi mynta ba ka Congress Party kan pyrshang ban wad da ki MLA barim bad Nongïalam barim ba kin ïakhun ïa ka elekshon na ka ticket jong ka” ong une u MDC uba la leit aiti ïa ka shithi iehnohkam hynne ka janmiet ha ryngkat ki Nongïalam ka Block Congress Comittee ka Rambrai-Jyrngam.
Kat kum ka jingong jong u, ka ticket jong ka Congress ka dei kaba jur ka jingïaknieh ha ki por bala leit noh hyn rei ha kine ki sngi, ka party ka hap ban wad ïa ki kyrtong. “Kane ka dei ka jinglong jingman jong ka Congress ha kine ki sngi ba mynta” ula ong.
Une u MDC uba la don hapoh ka Congress haduh phra snem, ula ong ba kane ka jinglong jingman ba mynta jong ka Congress ka dei tang namar ka jingïapher jingmut bad jingiashrut hapdeng ki nongïalam.
“Ngi lah ban ïohi ba kam dei ka daw ka jongngi hynrei ka jingiashrut kaba don hapdeng ki Nongïalam ym tang hangne ha Jylla hynrei ha ka National Level ruh” ong une u MDC uba la pynpaw ïa ka jingpang mynsiem ban hap ieh noh na ka Congress.
“Baroh ki Nongïalam (incharge) jong ki Jylla baroh, nga lah ban ong ba ki dei kiba kyrsum ha ka jyrsieh bad kane ka dei ka daw ka jinghiar jong ka Congress namar ba kim sngap shuh ïa ki paidbah, ki briew ba don ha ka party, ki nong trei ka party hynrei kila shu shim rai tang marwei-Kane ka dei ka daw ba nga ieh noh na ka Congress” ula bynrap.
Haba kren halor ka kynrum kynram kaba mih hapoh ka Meghalaya Pradesh Congress Committee (MPCC), u Bah Bajop ula ong “Baroh ki MLA bad ki MDC kila shim rai ban jied ïa u Bah Charles Pyngropew kum u President ka MPCC bad kila phah ruh da ka jingthoh hynrei ngam tip ka jia aiu hapoh ka AICC, kala pynkylla bad thung pynban ïa u MP ka Lok Sabha kum u President”.
Une u MDC u ong “Hooid ngi la pyrshang ban ïai neh beit bad ka party bad hooid, ha katei ka por, wat ki 12 ngut ki MLA ruh kim shym la ieh ïa ka party hynrei ngi da ka jingiashrut hapdeng u Nongïalam ka CLP bad u President ka MPCC la pynlong ïa kine ki MLA ban mih noh na ka party bad pynsah satang 5 ngut ki MLA”.
Hynrei ula ong ba hadien ba kine ki 5 ngut ki MLA kila leit ban kyrshan ïa ka Sorkar, ka rai ban shim ïa ka sien jam ba tyngeh ha kaban sospon ïa kine ki MLA, kala lam sha ka jinghap syndon jrain raiñ raiñ jong ka Congress Party.
“Kat haduh mynta ngam pat ïohi satia ïa kata ka hukum sospon ïa ki MLA ka ban wan na ka AICC. Shaei kata ka hukum ne ka dei tang ka hukum na ka MPCC. Ki Nongïalam ka MPCC kila shu tei pop ba ka dei ka rai jong ka AICC. Phi dei ban kylli ïa kane na ka Ophis ka MPCC” ula ong haba bynrap “Ka dei ka hok jong ki (MLA) ba kin leit kyrshan ïa ka Sorkar hynrei ka jingsospon ka dei ka kam kaba bakla palat.