Assam, Risaw 28: Ha ka miet ba la thmu ban pynlong ïa ka jingïalehkai phutbol ha Toupia Mini Stadium, ki paid nongkyrshan da ka jingbitar ki la pynkylla long madan thma ïa kane lympung kaba la khmihlynti ban sdang bad pynjulor ruh ïa ka madan.
Ka jingïalehkai kaba la thmu ban sdang ha ka por 6 baje janmiet, hynrei kane ka jingïalehkai ka la kynduh ïa ka jingpynslem kaba ym shym la khmihlynti bad haduh 8 shiteng janmiet ruh ym pat shym la sdang ïa ka, bad kane ka la pynkhihwin ïa ki nongkyrshan bad da ka jingbitar ki la prong tuh da ka bor ban rung shapoh madan bad pynjulor lut kat kaba ki don hapoh Stadium.
Ka jingshah thombor ka la wanrah ïa ka jingjulor kaba jur kaba la kot sha da ki lak, ha kaba ki shuki, ki tiar, bad kiwei kiwei ki jingtei hapoh madan ki la shah pynjot lut.
Katba ka jingïakynad ka nang jur, ki dkhot jong ka komiti pynïaid ki la shem ba ki la shah pyndik ha ka jingbitar jong ki paidbah, ha kaba ki la hap ban phet krad noh na katei ka jaka ban lait na ka jingmynsaw.
Ka jingïalehkai phutbol kaba la thmu ban long hapdeng ka Nagaon’s Amlan Jyoti Football Team pyrshah ïa ka Assam Police Commando Battalion, kam shym la ïohlad satia ban sdang.
Katkum ki tyllong khubor, la ong ba ka jingpynslem ka dei namar ba ka kynhun Amlan Jyoti kam shym la lah ban poi ha ka por kaba biang, bad kane ka la pynbitar ïa u paidbah bad pynkylla ïa katei ka stadium sha ka madan thma kaba jur.
Lah ban kdew ba ka song pisa khusnam jong kane ka lympung, ba la pynlong da ka Toupia Pashgaon Sports Association, ka la khring ïa kiba bun ki player na kylleng ka ri India bad ruh kiba nabar, hynrei ha ka miet ba la thmu ban sdang ka la mad ïa ka jingduhnong kaba khraw khlem da ïoh ban sdang kawei ka jingïalehkai.
Ki pulit kiba la mareh sha katei ka jaka, ki la hap ban ban tehlakam ïa ka jinglong jingman hynrei ka jingpynjot ka la dep ban jia, kaba la pynsah dak shibun ki jingjulor.
