Kylla ktien ki MDC ka NPP, rai ban kyrshan ïa ka jingpynbeit pud

Shillong, Ïaïong 29: Ki dak or pait ki la sdang ban paw ha ka kynhun synshar United Democratic Alliance (UDA) ha KHADC, haba ki 11 ngut ki MDC jong ka NPP, ki la rai ban kyrshan ïa ka jingïapynbeit pud hapdeng ka Meghalaya bad ka Assam bad kyntait ruh ban ïadon bynta bad ka Council ha kaba ai jingmudui sha ïingbishar ïa ka Memorandum of Understanding (MoU) hapdeng ka Meghalaya bad ka Assam.
Kane ka rai jong ka MDC ka Seng NPP ka long hadien lai sngi ba ka jingïalang ba la khot da ka KHADC ïa ki Khlieh Nongsynshar jong ki Hima bad ki Raid na khappud bad ka Assam, ka la rai ban ujor sha Supreme Court ïa kane ka jingïateh kular bad jingïapynbeit pud hapdeng ka Meghalaya bad ka Assam. Lah ban kdew hangne ba ha ka 26 tarik mynta u bnai, kane ka jingïalang ka la rai ban ujor sha Supreme Court ïa ka MoU hapdeng ka jylla Meghalaya bad Assam ban ïapynbeit pud da kaba shu ai bad ïashim.
Ka shithi ba la soi da ki 11 ngut ki MDC ka NPP, kata u Bah Pynïaid Sing Syiem, Bah Gigur Myrthong, Bah Lamphrang Blah, Bah Teibor Pathaw, Bah Alvin Sawkmie, Bah Victor Rani, Bah Rangkynsai Kharbuki, Bah Fantin Lakadong, Bah Bajop Pyngrope, Kong Grace Mary Kharpuri bad Kong Macdalyne S. Mawlong bad phah sha u CEM ka KHADC, Bah Titustarwell Chyne mynta ka sngi, ka ong ba ka kyrshan tyngeh ïa ka MoU ba la soi da ka Meghalaya bad Assam. Nangta la ong ruh ba kin nym ïadon bynta bad ka kynhun ha KHADC ban ujor ïa kane ka kam sha ïingbishar. Kane ka shithi ka kynnoh ruh ba u Vice Chairman jong ka Boundary Committee, u Bah Jambor War , u la bakla ha ka jingai khubor sha ki lad pathai khubor namar ka jingïalang ha katei ka sngi, ka khlem rai ban ujor sha ïingbishar, hynrei ïa kane ka bynta la ieh ha ka jingstad ki Hima bad ki riew shimet.
“Ngi la rai da kawei ka sur ba ngin ym ïadon bynta eiei ruh em bad kano kano ka jingthmu da ka kynhun napoh ka KHADC ban mudui mukotduma halor kane ka mat sha kano kano ka Ingkashari,” ong kine ki 11 ngut ki MDC ka NPP.
“Ka jingthoh ba la phah sha ki lad pathai khubor ïa kaba la soi da u Vice Chairman jong ka Border Commitee u Bah Jambor War ka long kaba bakla. Kane ka long na ka daw ba ka rai ba la shim ha ka jingïalang kam shym long satia ba ka Council kan mudui ha Ingkashari, hynrei la ieh beit ha ki Hima bad ha ki kynhun shimet ban leit apil sha ka Ingkashari lada ki sngew donkam,” ong shuh shuh kine ki 11 ngut.
Ka KHADC ha ka jingïalang jong ka Border Committee kaba la long ha ka 26 tarik mynta u bnai ka la shim ïa ka rai ba ka Council ha ryngkat bad ki khlieh nongshynshar jong ki San tylli ki Hima kin leit ban ujor sha Ingbishar pyrshah ïa ka MoU ba ba la soi hapdeng ka Sorkar Assam bad ka Sorkar Meghalaya.
U Deputy CEM ka KHADC u Bah Gigur Myrthong ha ka jingïakren bad ki lad pathai khubor u la ong, “ka jingbymtreh ban leit shim bynta lang ban ujor sha Ingkashari pyrshah kane ka MoU ka long namarba ha ka sngi ba la pynlong ïa ka jingïalang jong ka Border Committee ym shym la shim rai eiei ba ka Council kan leit ujor sha Iingkashari hynrei la ailad beit ha ki Hima bad ki riewshimet ba lada ki don ka jingbymhun ïa kane ka MoU ki lah ban leit ujor sha Ingkashari.”
U Bah Gigur u la pynshai ruh ba ka jingïadon bynta lang jong u ha kato ka sngi ha ka jingïalang jong ka Border Committee ka long namarba ym don u CEM bad kum u Deputy CEM un hap ban don lang watla um dei u dkhot jong ka Border Committee.
U dkhot jong ka Border Committee u Bah Pynshngaiñ N. Syiem, haba bynrap halor kane, u la ïathuh ba ïa ka Border Committee hi la thaw da ka Excutive Committee jong ka KHADC ha kaba baroh hi ki ïadon bynta lang bad la thaw ruh ïa ka Coordination Committee ban pynbit pynbiang na ka bynta ban leit ujor pyrshah ïa ka MoU sha ka Ingkashari.
“Lada ki MDC jong ka NPP ki la kynran dien, mynta kan shong sa ha ka UDP la kan ïaid neem shakhmat halor kane ka rai bad kumjuh na ka liang ka Congress ruh kan sa shim la ka rai halor kane ka bynta,” u la ong.
U Nongaibuit jong ka United Democratic Party (UDP) u Bah Bindo M Lanong u la ong, “ngim pat ïoh ban ïasyllok bad ki MDC ha ka Party UDP hynrei ha ka jingsngew jong nga marwei, ka party ka dei ban ïaid shakhmat ban kyrshan ïa ka rai jong ka Border Committee jong ka KHADC.”
“Nga sngew ba ka UDP ka dei ban ïaid shakhmat ban ujor sha Ingkashari pyrshah ïa ka MoU namarba lada ngim leh kumta ngin duh ei ïa la khyndew ka shyiap” bynrap u Bah Bindo Lanong uba dei ruh u MDC shu sieh ka Council.
Hynrei ki tyllong khubor kiba la ïoh lum,ki ïathuh ba kane ka jingkylla ktien ki MDC ka NPP, kadei namar ba ki la shah mai bad shah kynhied ha u Nongïalam jong ki u Conrad Sangma, uba long u Myntri Rangbah ka jylla bad uba nongïasoi ïa ka MoU bad ka Assam. Ki khubor ki ïathuh ba u Conrad mar ïohi ïa kane ka khubor na KHADC ha kaba ki MDC ka NPP ki la ïadon lang, u la bitar bad khot kyrkieh ïa ki ban pynpaw ïa ka jingbym sngewtynnad ïa kane ka jingleh jong ki bad hukum ïa ki ba kidei ban weng noh shisyndon na kane ka jingïarailang.