Kylla ktem dawa pisa ki khyrdop peit masi, kynnoh ki nongshoh doh

Shillong, Jymmang 12: Ka Seng jong ki nongshoh doh masi, ka Khasi Jaintia Butcher Welfare Assiociation (KJWBA), ka la kynnoh ba ki khyrdop kiba dei ban peit ïa ka koit ka khiah ki masi shuw aban rung sha jylla, ki kylla long pynban ki khydop lum pisa.
U President jong ka Seng, u Bah Generous Warlarpih, haba ïakren bad ki nongthoh khubor mynta ka sngi, u la kynnoh ba ka jingshah dawa pisa jong ki dkhot ka long ka ba shyrkhei ha kat ba don ki khyrdop, bad lada ki ïohi lei ba kit ïa ki masi wat ki pulit ruh ki beh thong ia ki nongkhaïi. “Kaba pynlyngoh ka long ba ka jaka ba la buh ban peit ïa ka koit ka khiah jong ki masi, ka kylla long pynban ka kten dawa pisa”, u la ong.
U Bah Warlarpih, u la ïathuh ruh ba hadien ba la mih jingeh ban wanrah masi na shabar, ki nongshoh doh masi ki la leit ban thied tang saw lane san tylli ki masi na la ka jylla bad haba thied na jylla la jong ym ïoh challan, namar na ki nongkyndong kumno kin ai challan. Hynrei yn da la poi ha ka jaka Check point ka ba dei ban peit ïa ka koit ka khiah jong kine ki masi ki pan ia ki kot ki sla bad lada ngim don ki dawa da ka pisa na ki nongkhaïi masi.
Namar ki jingeh kiba bun bad khamtam eh ka jingbym don jingkyrmen shuh ban lah ban weng ia ki jingeh jong ki nongkhaii masi ha ka jylla, ka seng ka ba la thaw ban peit ia ka bha ka miat ki nongkhaii masi ha ka jylla ka Khasi Jaintia Butcher Welfare Assiociation (KJWBA) ki la shim ia ka rai ban pynsangeh noh ka jingtrei kam ka ne ka Assiociation .
Ha ba ïakren bad ki lad pathai khubor na ka liang u President ka Assiociation u bah Generous Warlarpih u la kynnoh ba ka rai ban sangeh trei kam noh ka KJWBA ka long hadien ba na ka liang ka Sorkar kam lah ban tehlakam ïa ka jingsam pathar ia ki permit bad kumjuh halor ka jingshah dawa pisa na ki ophiser ka Veterinary ki ba don ha check point ha Umling Ri Bhoi District .
U Bah Warlarpih, u la ïathuh ba ïa kane ka Assiociation la seng naduh u snem 1988 kum shibynta ban teh lakam ia ki para dkhot nongkhaii bad nongotdoh ha ka jylla ban pynïaid sha shakhmat ïa ka jingshakri ba kan ïaid beit ïaid ryntih ka jingot doh masi ha ka jylla, hynrei ha ka jingïalang ka ba la long mynta ka sngi ka la shim ïa ka rai ban khylliap lama noh ïa ka ne ka Assiociation na ka daw ba ka Seng kam lah ban weng iaka jingeh jong ki nongkhaii masi ha ka jylla.
Ha ba ïathuh ia ka jingshem jingeh jong ki nongkhaii masi ha ka jylla ki ju mad man ka por na ka liang u bah Warlarpih u la ïathuh ba hadien ba ka Sorkar Assam ka la pyntrei kam ia ka Cattle Prevention Act ha ka jylla Assam, ka Sorkar Jylla ruh ka la iatrei shitom ban iarap ban lah ban pynwanrah ia kine ki masi sha ka jylla “Wat la ngim lah shuh ban thied ia ki masi na ka jylla Assam hynrei ngi dang lah ban wanrah na Utter Pradesh, Bihar bad West Bengal bad ka Sorkar ka la shim khia ban pynbiang ban pynlait ia ki permit”u la ong .
U la ong shuh shuh ba ha kane ka jingai permit ïa ki nongkhaii masi ka wanrah jingeh ïa ki na ka daw ba ka sorkar ka khlem shimkhia ban ban peit bad bishar ïa ki ba dei hok ban ïoh ïa ka permit hynrei ki la shu sam pathar ïa kine bad kane ka permit kam dei ka ba la pynlait ban wanrah ïa ki masi kat kum ka aiñ sha ka jylla.
U la ïathuh ruh ba kawei na ka jingeh ka long namar kim lah shuh ban wanrah ïa ki masi sha ka jylla kumta na ka liang ki nongkhaii masi ki ju leit wad ia ki masi na kylleng ka jylla khamtam na ki thain RiBhoi ,hynrei hangne ruh ka jingeh ka long namar ka jingshah dawa pisa na ka Check point ka ba don ha Umling Ribhoi District.
U wei na ki nongkhaii masi u bah Khrawkupar Kharnaior u la ïathuh ba ka long ka jingeh ka ba khraw wat ban wan rah ia ki masi ki ba ki thied hi na ka jylla ruh “Ka jingeh jong ngi ki nongkhaii masi ka long ka ba kham palat ban ïa ki nongkhaii drok namar ba ngi mad shibun ka jingshah dawa pisa khamtam ha ki thaiñ Patharkhmar terter Ribhoi District ki ba mih na khlaw ruh ki mih ban dawa pisa na ngi”u la bynrap.