Kylla kamkai noh ka jingïakop tai nia hapdeng ka TMC pyrshah ïa ka Sorkar MDA

Ha kane ka taiew ba la dep ki khubor ki saphriang shaid ba u Deputy Chief Minister ka Jylla Meghalaya u la kop bad kyrhuh la kat u ‘laren ha ki lad pathai khubor pyrshah ïa u National Spokeperson jong ka All India Trinamool Congress u Saket Gokale.
Ka jingïakop ka la mih naduh ki bnai ba ladep ba u Gokhale u la wohkjat pyrshah ïa ki kam umdum kane ka Sorkar ha ki liang baroh naduh ka jingbym ïaid beit ïaid ryntih ha ka Scheme Smart City, ki kam kyllaiñ ha MeECL, bad kiwei kiwei. Na ka liang u Deputy Chief Minister da ka jingsngew rem bad sngew tip eh, u la dumok tyngeh ïa u nongaiktien ka AITC bad kop syndon ba lada u kwah shisha kum u riewshlur u dei ban wan ïakren bad wan ïatai nia ha Shillong.
Hynrei, utei u nongaiktien ka AITC ruh u la pdiang sngewbha bad kohnguh shisha kumba kwah u Deputy Chief Minister bad u la ai jingmut ban pynlong ha ki taiew ba nyngkong jong u bnai Risaw 2022 ha kano kano ka sngi bad ka por ba u Deputy Chief Minister u lait por.
Utei u nongïalam u la long ruh uba la kloi bad uba la pynkhreh ban ïa pyni nia tangba u ai jingmut pat ba dei ban leh hakhmat ka jingsakhi lang jong ki lad pathai khubor bad ki nongpeit ne nongsngap lang.
Ki paidbah kylleng ka Jylla ki la ïa shongshit shisha ban ïoh peit bad bishar ïa ki jingshisha mano ba dei bad mano ba lait. Phewse! ka jingkren kyllaiñ jelabi jong u Deputy Chief Minister ka la pynpulom bad kylla kamkai noh katei ka kam shisha.
”Kito ki briew kiba ju kheiñ ‘riewkai bad khawpud ïa kiwei, ki kylla ‘riewkai bad khawpud pynban ïa lade.”
Ha ki ri kiba la shai bad ïaid shakhmat, ki nongsynshar bad ki Candidate kim ju donkam leit Canvas shuh sha u paidbah hynrei ki paidbah ki shu ïa peit bad sngap ban bishar ïa ka jingstad bad jingtbit jong ki nongïalam lyngba ka jingïatai nia ba la pyni ha ki Tv ne ki lad pathai khubor (media). Hynrei, ka jingkren kyllaiñ jelabi jong u Deputy Chief Minister ka la pynduh mynsiem noh ïa ki paidbah kiba la angnud ban sngap shisha ïa ki jingshisha baroh.
Kane ka jingleh ka ktah mationg ym tang ïa ka Sorkar MDA, ka party ba ki don hynrei ka phalang bad kyrtoh kylla ruh ïa ka burom ka ijot bad ïa ka jinglong jong ki briew kiba shong ha kane ka jylla jong ngi hakhmat ki briew kiba don shabar jong kiwei pat ki jylla ka ri India. Kumno kiwei ki briew kiba don shabar ka Jylla Meghalaya kin ong ne pyrkhat ïa ki briew ka Meghalaya?
Ka jingkylla ktien ban ïakren sha ki kam party pynban ka paw biej hakhmat ki paidbah. Haba u briew u kwah ban ïakren ïa ki rukom treikam jong ka Sorkar, mynta pat kwah ïa tainia kylla sha ka kam jong ka party NPP. Hynrei,kaba kham pynglyngngoh shuh shuh ïa ki paidbah ka dei ka jingkwah pynban u State President jong ka NPP uba long ruh u MP ka Meghalaya sha Rayja Sabha ban ïa kop tainia pynban ma u hakhmat u paidbah. Ha ka jingshisha, ïa u MP la jied khnang ba un leit ïatai nia ha Dorbarbah ha Parliament, la ka long ka Lok Sabha ne Rajya Sabha.
Ki paidbah ki kham kwah bad angnud ban ïohi bad sakhi ïa ka jingtbit u MP jong ngi ban ïasaid bad tainia ha Parliament halor ki mat kiba ktah ïa ka ri bad ka jaitbynriew kum ka ILP, ka jingpynrung ïa ka ktien Khasi ha ka Khyrrnit Baphra, ka ishu ïa pynbeit pud, ki jaka shipai (defence land) ha Shillong nalor bun kiwei pat. Kam don jingmut ba kat u MP un ïatai nia pynban bad ngi u luk u lak, u paidbah u paidkar.