Nongstoiñ, Jylliew 17: Watla ka jingbuh ki speed breaker ba la shna da ka PWD ha Jeidohkroh shuwa ban poi ha ka bynta ba long khonwaiñ bha, ka la pynduna ïa ka jingkyllon jong ki kali ha katei ka jaka. Hynrei ka buh jingma pat ïa ki kali kiba kit jingkit kiba hiar na Shillong bad ki ba kiew na Nongstoiñ, namar kitei ki speed breaker ki kynjang palat.
Ha katei ka jaka, hynne ka step ha ka por kumba shiphew shiteng, kawei ka trok kaba kit jingbam kum ki chips bad biskit kaba thumu ban leit buh sha Nongstoiñ, kaba don ïa u registration number AS 01. HC 4259, kaba la ñiah da u Vinoy Sinha u ba shong ba sah ha Karimganj District Assam, ka la hap sha poh ka kynroh bad ka la kylla lyndang.
U Vinoy Sinha haba ïa kren bad u nongthoh khubor ha katei ka jaka, u la ïathuh ba ha ka por ba dang jur bha u slap bad haba la poi ha katei ka jaka, u la ïaleh ban pynsuki ïa ka kali. Hynrei, na ka jingbym treikam bha shuh ka break, ka kali kam suki bad ha katei ka por kawei ka maruti kamai kaba wan na shaphang Nongstoiñ ka la poi hajan, kumta u la pynphai ïa ka kali shaphang kadiang bad ha katei ka por ka la kylla lyndang.
